Ez dakigu noiz, baina seguru gaude superbotila iritsiko dela. Josu Txapartegi irakasleak umeen aurrean agertu zuenez, ez ziren kortxoarekin fidatzen, usteldu egiten delako, eta estalki berezi bat egin diote botilari, ur tantaren bat sartzen bazaio edo balearen batek jotzen badu, helmugara onik irits dadin. Haren hitzak entzunda, espaziontzi baten estalkiaz ari zela ematen zuen.

Superbotilaren barruan Sarrionandiari bidali beharrekoak sartu zituztenean, Oier Illarramendi Euskadiko txapelduna agertu zen surf taula ikusgarri batekin. Haurrek lagundu zioten taula itsasoraino eramaten eta gainean zutik eraman zuen superbotila arraun eginez.

Zergatik Sarriri omenaldi hori? Istorioa oso sinplea da. Pirritx eta Porrotxek urtero ikuskizun bat egiten dute eta ikuskizuneko abestiekin CDa kaleratzen. Duela bi urte, “Patata patata” egin zuten; iaz, “Maite zaitut” (azken emanaldia joan den igandean egin zuten Zegaman)eta denboraldi berrirako estreinatu dute “Mari Mototx”. Porrotxek atzo agertu zuenez, Mari Mototx kontainer batean bizi da amarekin parke batean, eta guk emandako arroparekin eta diruarekin moldatzen dira. Egun batean On Txanpon eta Txanponi agertzen dira, eta parke horretan etxeak egiteko dirua eskaintzen diete. Arazo horretatik abiatzen da ikuskizunaren trama.

Atzo aurkeztu zuten abestien CDan Sarriren hiru kanta daude. Espresuki Pirritx eta Porrotxi bidalikoak bi dira, “Zebra koloreduna” (Jon Maiak kantatzen duena) eta “Itsasoko piratak” (Su Ta Garreko Gorosabel kantariak kantatzen duena). «Baina horretaz gain, guk aspaldidanik gelan Sarriren beste kanta bat abesten genuen, ‘Amatxo zuri’, Txapasen musika duena, eta hori ere sartu egin da CDan, istorioko protagonistak ama eta alaba direlako», kontatu zuen Arantxa Urbek, ikastolako irakasle eta pailazoen kolaboratzaileak.

Sarriren ama