Radio Kulturak lehen urteurrenean webgune berria aurkeztu du
BAIONA
Internet bidez zabaltzen den Radio Kultura.com-ek lehendabiziko urteurrena ospatzen du azaroan. Gero eta entzule gehiago biltzen dituen irratiak beste zerbitzu batzuk aurkeztu ditu webgune berrian. Aldi berean, orrialde berria erabilgarriagoa eta fidagarriagoa izango da. Atzo goizean abiatu zen webgune berrian, aurreko zerbitzuez gain, euskara ikasi ahal izango da Gure Irratiarekin elkarlanean ezarri duten Herritartzen ikasketa sistemari esker. Bestalde, musikan sail berriak ezarriko dituzte emankizunen «menuan». Musika sorkuntzak entzun ahal izango dira, eta, bestalde, musika sail bat sortuko dute. Bertan, iraupen ezberdinetako eta estilo anitzetako musika emankizunak aukeratzen ahalko dira. Errobi promotions elkarteak sortu duen irratiak ibilbidearen lehen urtean arrakasta handia izan du. Hilabetero 4.000 entzule inguru izaten ditu, eta kopuru horrek etengabe gora egiten duela nabarmendu zuten elkarteko ordezkariek. Egitasmoa Euskararen Erakunde Publikoaren diru-laguntzen eskuetan dago orain; izan ere, finantzamendurik lortu ezean, irratia desagertu egingo baita.
|
