Igoeraren ametsa bizirik mantentzeko, ezinbestekoa izango du Alavesek gaur Real Madrid Castillaren etxean garaipena eskuratzea. Orain arte egindako akats ugariek kale gehiago egiteko aukerarik gabe utzi dituzte Fabriren mutilak eta babazorroek ez dute lan errazik izango eurengandik puntu bakarrera dagoen talde gaztearen aurka, are gutxiago Wellington aurrelaria gabe. Brasildarra, faringoamigdalitisak jota, Gasteizen geratu da eta Ogbeche nigeriarrak hartuko du bere lekua hasierako hamaikakoan.

Castilla gaztea, horren gogorra den Bigarren Mailan, oso ez ohiko taldea da. Indarra, presioa eta esperientzia nagusi diren txapelketan, Michelen mutilak kalitate izugarrizko multzo biguna edo egin gabea osatzen dute. Hala, oso talde irregularra da eta euren kalitateari esker, aurreko astean Herculesi 0-3 irabazi zioten Alacanten. Lehen taldearekin, Anoetarako, Miguel Torres atzelaria bakarrik deitu du Capellok, beraz De la Red, Granero, Tebar edo Negredo aurrelari arriskutsua parean izango dituzte Fabriren mutilek.

Jandro, deialditik kanpo

Wellington aurrelariaren hutsuneaz gain, Fabrik atzo emandako deialdiko berrikuntza nabarmenena Jandro etxean utzi izana da. Asturiarrak ez dauka inolako lesiorik eta orain arte beti sartu izan da aukeratuen zerrendan, baina galiziarrak eta Pitermanek ez dute Castillaren aurkako partidarako deitu.

Hamaikakoari begira, Ogbecehe izango da aurrealdean Wellingtonen postua beteko duena, nahiz eta Aloisi deialdian izan, eta Malagaren aurkako partida galdu zuen taldearekin alderatuta, gainontzeko berrikuntzak Mateo eta Astudillo kapitaina izango dira, partida batetako zigorra bete ostean.