Ez zen ezusterik izan, eta Floren Nazabalek eta Juanjo Lopezek irabazi zuten atzo Urrezko Aizkolarien Binakako Txapelketa, Joxejuan Barberena eta Donato Larretxea mendean hartuta. Sarrera bikaina izan zuen Izarraitz pilotalekuak. Dirua txapeldunen alde atera zen.

Saio estua izan zen, eta ia amaierara bitarte ez zen erabaki. Bosgarren lana izan zen finaleko auzia erabaki zuena. Hasteko, 45 ontzakoa erdibitu behar izan zuten, ahalik eta kolperik gutxienean. Biko bakoitzean, aizkolari bakoitzak enborraren alde bat moztu behar izan zuen. 33 kolpetan erdibitu zuten Larretxeak eta Barberenak; Etxarrikoak eta Lezaungoak, berriz, hiru kolpe gehiago behar izan zituzten.

Bigarren lanean, bi 45 ontzako etzanda erlojuz kontra erdibitu behar zituzten, eta biko bakoitzetik, aizkolari bakoitzak enbor bat moztu behar zuen. Nazabalek eta Lopezek irabazi zuten. 1.26 izan zen haien denbora; eta aurkariena, berriz, 1.39.

Hirugarren lana zen aizkolarien artean beldurrik handien sortzen zuena. Bikoek, txanda librean, 86 ontzako enborra moztu behar zuten zutik. Horrek, ordea, ez zuen ezer erabaki, segundo bakar bateko tartea bakarrik egon baitzen. 4.48 izan zen Nazabalen eta Lopezen denbora, eta segundo bat gehiago behar izan zuten aurkariek.

Bosgarren lanak erabaki zuen

Laugarren lanean, oinbiko bat moztu behar zuten txanda librean, eta berriro ere Lezaungoa eta Etxarrikoa nagusitu ziren. 2.37 izan zen haien denbora, eta 2.41, aurkariena. Azken-aurreko lanak erabaki zuen finala Larretxea eta Barberena ez baitziren batere ongi aritu, eta han galdutako tartea errekuperatzea ezinezkoa izan zitzaien. Hor kana-erdiko bat zutik, eta bestea etzanda moztu behar zuten, eta biko bakoitzetik, aizkolari bakoitzak enbor bat moztu behar zuen. 2.27 izan zen gero txapela jantziko zuen bikoaren denbora, eta 2.52 Barberenaren eta Larretxearen denbora.

40 segundo pasako aldearekin heldu ziren azkeneko saiora. Finala erabat erabakitzeko zegoen, baina garbi zegoen oso zaila izango zela Nazabali eta Lopezi txapelak ihes egitea, eta horrela gertatu zen. Finala amaitzeko, biko bakoitzak bi kana-erdiko, bi 60 ontzako eta bi oinbiko moztu behar izan zituzten. Larretxeak eta Barberenak gogor ekin zioten lanari, baina inoiz ezin izan zuten ihes egin. Proba hori irabazi zuten; txapela ez, ordea. 13.20 izan zen haien denbora; eta 13.33, berriz, aurkariena. Lan guztiak amaitzeko, 26 minutu eta 27 segundo behar izan zituzten Nazabalek eta Lopezek; 26 minutu eta 59 segundo, berriz, Larretxeak eta Barberenak.

Amaieran, oso gustura zegoen Floren Nazabal; izan ere, lesio asko izan ditu azkenaldian, eta berriro ere garaipenen bidera itzuli baitzen: «Txapelak irabaztea beti gustagarria izaten da. Uste dut final estua izan dela. Alde dezentearekin heldu gara azkeneko saiora, eta denen beharra izan dugu».

Askoren ustez, zutikako enbor handiak erabakiko omen zuen finala, baina hark ez zuela ezer erabaki onartu zuen: «Banekien huts handi samarra egin ezean hark ez zuela erabakiko, eta horrela izan da. Gero, amaierara, alde nabarmenarekin heldu gara, eta horrek kontrolatzen uzten du, eta errazago eraman ahal izan dugu».

Izandako lesioek nahiko lasai uzten zutela esan zuen. «Orain nahiko ongi nabil, baina asko estutuz gero, gerrian izandako arazoa non izan zen ederki nabaritzen dut», adierazi zuen Etxarrikoak.

Joxejuan Barberenak beste aldeko aurpegia erakusten zuen, finala galdu baitzuen. Berueteko aizkolari beteranoak garbi zeukan non galdu zuen finala. «Azkeneko saiora 40 segundo atzetik heldu gara, eta garbi geneukan horien aurka ez geneukala ezer egiterik, haiek oso ongi aritu baitira. Guk bosgarren proban galdu dugu. Han tarte handia kendu digute, eta hura berreskuratzea oso zaila zen», aitortu zuen.