Eric Knight ingelesak maskota honi buruz idatzi zuen lehenengo kontakizuna argitaratu zela 70 urte beteko dira laster, eta Elizabeth Taylor izeneko haur antzezle baten errebelazioa ekarri zuen «Kate ikusezina» filman pantailaratu zen estreinakoz 1943an. Hamar bat film luze gehiago eta zenbait telesail egin izan dira geroztik.

Jatorrira itzuli eta, Bigarren Mundu Gerraren hasieran girotuta, haurrek animalienganako duten maitasunaren bidez gaindituko diren gizarte ezberdintasunak oinarri dituen jatorrizko eleberria egokitzea proposatu du zinema ingelesak oraingoan. Gertabidea beren haurtzaroan ezagutu zuten ikus-entzule helduek oroituko duten legez, Collie arrazako txakur txiki emeak Eskoziako mendialdetik Yorkshireko bere jaiotetxera itzultzeko egin zuen bidaia luzea kontatzen zuen istorioak. Bere jabe zen familia txiroak aristokrata aberats eskoziar baten ilobari saldu zion Lassie lan egiten zuten meategia itxi zutenean. Haatik, txakurkumea zenean hezi zuen mutikoa beharretsiz, bere albora jo zuen paisaia idilikoak gurutzatuz, iragarritako amai zoriontsuaren atzetik. Charles Sturridge errealizadoreak jada egina zuen oso antzekoa zen beste antzinako film bat, «Maitagarrien ipuin bat» izenekoa, eta han ere Peter O'Toole beteranoak parte hartu zuen antzezle gonbidatu gisa. «Lassie» filman neskato protagonistaren aitonaren papera antzeztu du. Protagonistarena, berriz, gaur egunerako ziur aski antzina Taylorrek eman zuen irudi txepelegitik aldentzen den Hester Hodges-ek. Charles Dickens-en melodrametarako itxura babesgabe ezin egokiagoa emateagatik bereizten den Jonathan Mason-ek antzeztu du mutikoarena. John Lynch-ek eta Samantha Morton-ek egin dute gurasoena, produkzio ingelesak beti bereizi izan dituzten aktore talde sendoa osatuz horrela.