Kanporaketako bi lehenengo laurdenetan ¯gainontzeko seirak galdu ditu¯ ezarritako erritmo bizia berreskuratu nahi du Baskoniak gaur Palau Balaugranan, kontra jarri zaion kantxa faktoreari buelta eman eta finaletik garaipen bakarrera geratzeko. Joko estatikoan Dusko Ivanovicen mutilen defentsak arazo handiak sortu dizkie gasteiztarrei eta igandean porrota jaso zuten Marconatoren eta Juan Carlos Navarroren lan erabakigarriagatik. Hala, Bartzelonan, gutxienez partida bat irabaztera behartuta daude.

Estatistikei begiratuta, ez da gauza erraza Palaun irabaztea, ACB ligan aurten bi talde baino ez baita lortu bertan nagusitzea, Baskoniak berak 86-99 eta Bruesa Gipuzkoa Basketek 65-67, baina abenduan jaso zuten azken porrot hori katalanek. Euroligan, CSKA txapeldunordea izan da, hain zuzen ere, Bartzelonan irabazteko gai izan den talde bakarra.

Hala ere, esan beharra dago ere bai, denboraldi osoan Baskoniak ez dituela sekula hiru partida jarraian galdu eta talde gasteiztarrak baduela maila Bartzelonan partidaren bat irabazi eta kanporaketa berriz ere gasteizera ekartzeko.

Unicajaren aurka gertatu ez zitazion bezala, saskiraketak lortzeko arazo handiak izaten ari da Baskonia, kanpoko jaurtiketak ez dira horren erraz eskuratzen (22 saiakeratatik bost hiruko baino ez zituzten sartu azken partidan). Barruan ere, Splitterrek eta Scolak behar luketen nagusitza ez da horren handia, erreboteetan nagusitu arren. Marconato Bartzelonara heldu zenetik, egin duen partidarik onena gauzatu zuen Zurbaon, baina italiarraz gain, Trias, Vazquez, Kakiouzis eta neurri apalagoan Kasun ditu erabilgarri Ivanovicek, Taun, aldiz, errotazioak Lou Roera murritzu ditu Boza Maljkovicek, Kaya Peker eta Mirza Teletovicek ez baitute minutu bakar bat ere jokatu, nahiz eta fisikoki ondo egon.

Partidako beste giltza nagusia defentsan egongo da, korrika egin ahal izateko, defentsan asko estutu behar dute arerioa eta orain arteko bi partidetan Bartzelonaren blokeoek min handia egin diote Maljkovicen taldeari, bai kanpoko jaurtiketekin baita barruko jokalarien mugikortasunagatik ere.

Beste aukera bat geratu litzatekeen arren, gaurko partidan irabaztea oso garrantzitsua litzateke; izan ere, orain arte bana berdinduta joan diren hamar finalerdietatik zazpitan, hirugarren partida irabazi duen taldeak egin baitu aurrera ACB ligaren historian.