Irribarrearen atzean...
Dorleta URRETABIZKAIA
Aktorea eta idazlea
Antzerkia: Nire taulen gainean jolasean aritutako lagun bat hil egin da. Dantza: Sentitzen dut. Feria: Baita neuk ere. Baina zuen festa handia dator hilaren 10ean. Donostiako XXIII. Feria. Eta pozik egon beharko zenukete.
Antzerkia: Nola egongo gara pozik, heriotza hain gertu badago? Bizitzak egun batetik bestera eskuetatik alde egiten badigu?
Feria: Irribarre baten atzean, benetako tragedia bat ezkutatzen delako beti. Heriotzak eraman duen emakume honek bere azken momentura arte erakutsi digun bezala.
Antzerkia: Eta zer da irribarrearen atzean, ikusterik izango duguna?
Dantza: Asier Zabaletaren estreinaldi bat, «El agujero del avestruz» izenekoa. Blanka Arrietaren «Rest», Matxalen Bilbaoren «Haiku 4» eta Biarritzeko Baletaren «Gari Beltza». Besteak beste...
Feria: Eta antzerkiari dagokionez... Traspasosen «Demasiado humano», Kanpingagsen «Lapurren kobazuloa» eta...
Dantza: Horixe zarete zuek...Dantzari lekua lapurtzen diozuen lapurrak!
Antzerkia: Et, et, et... Irribarrearen atzean bortizkeria ezkutatzen ari al zara?
Feria: Ikusleen gustuen arabera izaten da hori. Euskal Herrian dantzak baino publiko gehiago mugitzen du antzerkiak. Horixe da gure egungo errealitatea.
Antzerkia: Eta kalean ere, Donostiako alde zaharreko zokogune magikoetan, kale antzerkia ikusteko aukera izango dugu Arte eta bere musika bandarekin.
Feria: Eta antzokietan, Tanttakaren «Emakumeak izarapean», Vania produkzioen «Mandíbula afilada» eta...
Dantza: Eta haurrak? Horiei ere lapurtu egin behar al diezue?
Antzerkia: Ez. Haur eta heldutxoentzat ere, ikuskizun ugari izango dira. Hala nola, Vaivenen «Las inalámbricas», Agerre Teatroaren «Cabaret Infantil», eta Golden eta Kanpingagsen «Galipotx» ...
Feria: Eta Euskal Herritik kanpo datozen beste hainbat ikuskizun, musikari, ipuin kontalari...hots, antzerkiaren magia eskainiko dizkiguten milaka eta milaka artista ikusi ahal izango ditugu.
Antzerkia: Baina... Gure laguna?
Feria: Irribarrearen atzean maitasunez betetako agurrik beroena eman nahi diogu, Idoia Sagarzazu joan berri zaigun gure lagunari... Eta antzerkiaren magiak eta betikotasunak eraman gaitzala...
Dantza: Heriotza eta bizitza...
Antzerkia: Barrea eta negarra...
Feria: Bihotzeko zoko berean sartu eta irribarre atzean ezkutatuta dagoen tristurarekin, bizitza ospatzera. Ongi etorri!
