A.S.G. 25 urteko getxotarra Galeako labar batera erori zen asteartean. Ertzaintzak ateratzea lortu zuen helikoptero bidez, baina zauri larriak zituenez Gurutzetako Ospitalean hil zen. Lakuako Barne Sailak azaldu zuenez, ezbeharra Aixerrotaren ondoan izan zen gaueko bederatziak aldera. Arroka artean zegoen mutil gaztea.

Une horretan zauritua itsasotik erreskatatzerik ez zegoela ondorioztatu zuten larrialdi zerbitzuetakoek; horregatik erabili zuen Ertzaintzak helikopteroa. Hamarrak aldera mutila erreskatatu eta BECeko heliportura eraman zuten. Handik anbulantzian joan zen erietxera.

Atzo ere lagun bat hil zen istripuan, Larrabetzuko errepidean, eta bertze bat zauritu egin zen. Rover 214 markako auto batek eta Renault Kangoo furgoneta batek talka egin zuten Txorierriko Korridorean, Getxorako norabidean. Lehenbiziko ibilgailua irauli egin zen kolpearen ondorioz, eta barrenean zihoan pertsona bat errepidean etzanda gelditu zen. Berekin zihoan laguna, berriz, atera ezinik gelditu zen barruan. Furgonetan pertsona bakarra zihoan eta ez zuen zauririk izan.

Bizkaian, bertze istripu bateko protagonistak zorte hobea izan zuen. Gorbeiako gune malkartsu batean aitzinera egin ezinik gelditu zen 67 urteko zeanuriarrak ikara galanta hartu zuen, baina minik batere ez. 13.30ean SOS Deiak zerbitzuari hots egin zion gizonak laguntza eskatzeko eta 15.00etarako helikopteroarekin erreskatatu eta ibilaldiaren abiapuntura eraman zuten, Urigoitira.

Errioxan, San Torcuatoko hegazkin-zelaian, 45 urteko gizona larriki zauritu zen atzo goizean. Ultra-arin motordunean zihoala, zereal landa batera erori zen Arabako Yecora herriko laguna.