Gazte Eguna izango da gaur Berangon Santo Domingo jaietan. Horrek ez du adierazi nahi beste motetako ekitaldirik egongo ez denik, baina argi dago gazteek bereziki disfrutatzeko eguna izango dela.

Txistularien kalejira izatekoa da 11.00etan, baita meza eta haur parkea ere eskoletako jolastokian. Geroago, 13.00etan, aitita eta amamentzako hamaiketakoa eta dantzak izango dira Berangoko Simon Otxandategi dantza taldearekin. Geroago, airezko tunela jartzekoa dute Lantzarten.

15.00etan gazteen herri bazkaria egongo da, eta Santa Ana jaietako txosnetan eman behar da izena. Bazkaria 15.00etan hasiko da, eta antolatzaileek adierazi dutenez, hauxe da aurtengo jaietako nobedaderik garrantzitsuena. Izan ere, bazkaria antolatu duten lehenbiziko aldia da, eta, gainera, aurrerantzean berriz egiteko konpromisoa hartu dute antolatzaileek.

Bazkaria bukatu orduko txirrindularien lasterketa hasiko da, 16.00tan hain zuzen, eta ordu bat geroago, mus txapelketaren ordua izango dute Berangon. Baina lehen aipatu moduan, ez dira gazteak soilik izango eguneko protagonista, eta umeek haur parkearekin disfrutatzeko aukera izango dute eskoletako jolastokian 17.30etik aurrera. Ordu berean, Airezko tunelaren bigarren txanda izango da.

Dantzak alde batera utzita, beste aukera batzuk izango dituzte nagusiek; izan ere, 19.00etan Nagusien Etxeko Enparantza dantzaldia hasiko da Xandalo taldearen eskutik, eta ordu bat geroago idi-proben ordua helduko da.

Berangon behar den moduan larunbata bukatzeko, musika izango da berriro ere nagusi; Musikherria gaua izena jarri diote gualdiari, eta MIX6T, Banda Batzoki eta Feos pero majos taldeak arituko dira 23.00etatik aurrera.