Liga hasierak Athletici buruzko zalantzak handitu ditu. Gehienbat, taldea bigarren zatian erasoko jokoa eraiki ezinean ibili zelako. Hortaz, aurten pazientzia handia beharko dute zuri-gorrien zaleek. Izan ere, bizkaitarrena oraindik garapen fasean dagoen taldea da, eta hori argi geratu zen Osasunaren aurka. Gainera, Yeste, Orbaiz eta Iraola min hartuta daude, eta horrek ez du asko lagundu egoera leuntzen. Hala ere, usurbildarra Bartzelonaren kontrako partidan izango da.

Caparrosenek gogo biziz ekin zioten partidari, eta lehendabiziko ordu erdian markagailuan aurreratzeko aukera bat baino gehiago izan zuten. Baina minutuak aurrera joan ahala, Bilbon egiten zuen bero itogarriagatik, jokoaren erritmoa asko jaitsi zen. Horiek hala, bigarren zatian beste arean jokatzeko zailtasun handiak izan zituzten. Alde horretatik, defentsako lerroaren eta erasokoaren arteko baloi trantsizioa oso motela izan zen. Beharbada, Athleticen bi piboteen posizioak eta punta-erdi baten faltak egoera hori larritu zuten. Izan ere, Javi Martinezek, Tikok edo Muñozek Osasunaren zelaitik urrun hartzen zuten baloia, eta aurrelariengandik metro askotara zeuden.

Bartzelonari aurre egin behar

Orain, Camp Noun jokatu behar duten norgehiagokari begira, zuri-gorriek Osasunaren aurka erakutsitako sendotasun defentsiboari tinko eutsi beharko diote. Ziurrenik, Aitor Ocio ez da kataluniarren kontrako partidan izango. Zuri-gorrien atzealdeko liderra izan behar omen du gasteiztarrak, eta klubak jokalariari ateratako bigarren txartel horia errekurritu du. Hala ere, ez dirudi Ociok jokatzeko aukera asko izango duenik. Horrenbestez, Caparros Prietoren, Ustaritzen, Murilloren edo Javi Martinezen artean hautatzera behartuta egongo da.

Denboraldi-aurrean ikusitakoaren arabera, Prietok izango luke aukera gehien, baina dimoztarrak arazo fisikoak ditu, eta Nou Campen jokatzeko moduan dagoen ikusi beharko da. Ustaritz ere oraindik ez da guztiz sendatu. Hortaz, beharbada Javi Martinezek beteko du Ocioren hutsunea.

Aiegikoak erdialdea utziz gero, baliteke Pablo Orbaiz taldera itzultzea. Bestela, Muñozek eta Tikok beste inork baino aukera gehiago dute. Hala ere, Ander Murillok postu horretan joka dezake ere bai.

Hegalean David Lopez egotea ziurra da; ez, ordea, Etxeberria. Elgoibartarrak gainkarga bat du eta ikusi beharko da Bartzelonako partidan aritzeko moduan den. Haren ordez, David Cuellar, Susaeta edota Gabilondo -Lopez eskuinera pasatuta- aritzeko moduan egongo lirateke.

Azkenik, aurrelarien atalean, Caparrosek bere sistemari eusten badio, Adurizek eta Llorentek jokatuko dute. Dena den, ez da harritzekoa izango Bartzelonaren aurkako norgehiagokan aurrelari bakarra, Aritz Aduriz donostiarra, zelairatzea.