Azken asteetan pilatutako stress eta tentsio guztiak kolpetik askatu zituzten atzo Urdaibaiko arraunlariek. Bizkaitarrek beren historian lehen aldiz irabazi zuten etxeko estropada eta, Bermeoko jaiak izanda, sekulako festa izan zuten atzo Bou Bizkaiaren jarraitzaileek portu inguruetan. Kirol alderdiari dagokionez, Urdaibaik Ligan lortzen duen zortzigarren garaipena eskuratu zuen eta, bi estropadaren faltan, lehiaketa poltsikoan duela esan daiteke.

Patxi Bilbao entrenatzaileak Asier Zurinaga kanpoan utzi eta Asier Aregori eman zion ontzia afizioaren aurrean gidatzeko aukera eta bizkaitarrak bikain bete zuen bere lana. Izan ere, Oriok ongi eutsi zion etxeko traineruari aurreneko bi luzeetan eta bi ontziak pare-parean ibili ziren lan erdietaraino. Bermeotarrek, ordea, bigarren ziaboga oso ona eman zuten eta hortxe hasi ziren lauzpabost segundoko tartetxoa irekitzen.

Hortik aurrera, Urdaibaik Pedreñak bigarren luzean egindako denboraren kontra ibili behar izan zuen. Hirugarren ziabogan aldea bi segundokoa baino ez zen izan bermeotarren alde, baina azken luzean erakustaldi bikaina emanda, alde hori hamar segundora iritsi zen. Pedreñak bigarren amaitu zuen, Oriok hirugarren eta San Pedrok, bikain, laugarren.

Hauxe da Urdaibaik atzo erabilitako koadrila: Bereziartua, Rodriguez, Carrion, Gallo, Arrizabalaga, Polo, Duñabeitia, Portularrume, Zabala, Gaizka eta Gorka Olazar, Millares, Zulaika eta Arego patroi lanetan.

Beheko postuetan aldaketarik ez eta Mecos eta Arkote izango dira jaitsiera kanporaketan. Laredok eta Cabok amaitu dute aurtengoz denboraldia.