Urtero bezala, Kilometroak jaiak urriko lehen igandearekin batera egingo dute aurten ere. Biharko edizioa Bergarako Aranzadi ikastolak antolatu du, eta bertan lortutako dirua, Errege Mintegian erabiltzen dituzten instalazioetan inbertituko dute.

Aranzadi ikastolak, gainera, bere lan filosofiaren adierazgarri bilakatu nahi izan du Kilometroak'07. Elkarlana izan da urte osoko prestakizunetan gailendu den hitza. Horren adibidea aurtengo abestia sortzeko prozesua izan da. Bergarako bertso-eskolak, dozena bat musikarik, ikastolako umeek osatutako koroak... lagundu dute letra eta musika sortzen eta diskoa zein bideoklipa grabatzera.

Naturagunea eta hirigunea

Naturagunea eta hirigunea hartuko ditu Bergaran atondu duten ibilbideak. Horiek hala, hainbat gunetan izango diren ekitaldiak gozatzeaz gain, Bergara inguruko parajeak ezagutzeko aukera izango dute bihar Kilometroak jaira bertaratuko diren euskaltzaleek.

Zirkuitu irekiera 9.30ean egingo dute, ohiko zinta mozketaren bidez, ikastola ondoan egongo den sarrera nagusian. Horren ostean, umeentzako ekitaldiak izango dira nagusi goiz osoan, eta arratsalde partean, berriz, musikak beteko ditu gunetan izango diren agertoki guztiak.

Kilometroak'07ko jaian parte hartu nahi izanez gero, antolatzaileek herrietan antolatzen diren autobusak eta garraio publikoa erabiltzea gomendatu dute. Hala ere, kotxez bertaratuko direnentzat aparkaleku bereziak prestatu dituzte.

Euskal Curriculuma

Udalbiltzaren ordezkaritza bat Bergaran izango da zirkuituaren irekiera ekitaldian. Udalbiltzaren arabera, Kilometroak Euskal Curriculumaren garapenerako lanari bultzada emateko aukera ezin hobea izango da.