Txapelketaren aurkezpen ekitaldian kanporaketak erabakitzeko erabili ziren pilotatxoekin baina askoz gusturago bukatu zuen Aratz Mendizabalek atzoko Labriteko aukeraketan aukeratutakoekin. Izan ere, larunbatean Iruñeako Bombonerako udazkeneko denboraldia irekitzeko jokatuko den partidarako materialak inolako aitzakiarik ez zuen arren, arerioa aukeratzeko egin zen zozketan batere zorte onik izan ez zuela uste baitu Zaldibiako aurrelariak.

Atano XIII.ak aurkeztutako sortan bi pilotariek bilatzen zutena aurkitu zuten eta Mendizabalek oso argi zeukan ze pelota klase nahi zuen Bengoetxea VI.aren aurka jokatzeko. «Ni saiatu naiz pilota lentoxeagoa bilatzen, badakidalako Oiantzek partidari erritmo handia jarriko diola eta abiadura handia sartuko didala. Oinatzek aukeratutako pilotak ere probatu ditut, bat behintzat nerearen oso antzerakoa aukeratu du eta bestea azpitik gehixeago ibiltzen dena baina laurak ere jokatzeko modukoak», aipatu zuen.

«Zozketan ez det uste zorte handiegirik izan nuenik. Neretzat baziren Oinatz baino arerio hobexeagoak baina Bengoetxea tokatu da eta izenez eta izanez uda honetan demostratu du pilotari handi bat dela. Aurrelarietan, onena ez bada onenetakoa izan da eta moral izugarriarekin dago. Badakit partida oso zaila izango dudala baina ni nere partida egitera joango naiz eta ea susto bat emateko gai naizen».

Arrazoirik ez du falta pilotari gipuzkoarrak, izan ere Leitzakoa udako torneorik gehien irabazi duen pilotaria izan da Abel Barriola herrikiderarekin, bere garapena bikaina izaten ari dela demostratuz. Baina aurtengo saltoaren aurretik ere, Asegarceko aurrelariak erakutsi izan du kaiolan ondo jokatzeko gai dela, azken bi txapelketetan final laurdenetara iritsi baita, Capellan, Eugi, Martinez de Eulate eta Agirre bezalako pilotariak kanporatu ostean.

Askoz ere dizdira gutxiagoko uda izan da Aratz Mendizabalena, abuztuan sei partida baino ez zituen jokatu zaldibiarrak, eta horrek txapelektan jokatuko ote zuen zalantzak piztu zizkion, nahiz eta txartela eskuratua behar lukeen arren iazko Bigarren mailako txapelduna izan ondoren. «Iaz Bigarren mailako txapela janztea egokitu zitzaidan eta aurten lehen mailan jokatzeko aukera eman dit enpresak eta neretzako aukera handi bat da. Oinatz Bengoetxearen aurka jokatzaeak berak ilusioa ematen dit eta partida iristeko gogoz nago», azaldu zuen.

Kanporaketa gainditzen duen pilotariak badaki dagoeneko ze arerio izango duen final zortzirenetan, Esaini oso erraaz irabazi zion Mikel Goñi. Aratz Mendizabalek, ordea, ez du larunbataz haratago begiratu nahi.