Lendakaris Muertos taldeak prest du «Vine, vi y me vendí» hirugarren lana, datorren astelehenean, otsailaren 25ean, argitaratuko dena. Bertan, ohiko punk doinu bizkor eta hitz pozoitsuez gainera, DVD bat ere aurki daiteke, taldeak zuzenean izandako jarduera zoroaren erakusle. Orain, laukoteak Los Mas Vendidos Tour jarriko du abian. Biraren lehenengo hitzordua bihar bertan izango da, Santurtziko La Kelo gaztetxean, eta gu taldeko abeslari den Aitor Ibarretxe lehendakariarekin mintzatu gara.

Izenburuak taldea saldu egin dela esaten du argi eta garbi, eta memento batez punk musika zokoratu eta Operacion Triunfoko musika egiten hasi ote diren pentsatu dugu. Ibarretxek esan duenez, «saldu garen salaketa egin dutenen omenezkoa da izenburua, eta haiek esan beharko dute zertan saldu garen». Lana aztertzen jarraituz, «ez dut uste bilakaerarik izan dugunik», esan du Ibarretxek. «Taldeak betikoa eskaintzen du. Hitzak betikoak dira, baita musika ere. Agian lan berria aurrekoak baino are bizkorragoa da eta hogei kantu bildu ditu ordu erdian». Aldaketa nabarmenik ez egon arren, «gustuko dugun musika lantzen jarraitu dugu», eta urteen poderioz hobeto jotzen dutela ere aipatu du kantariak.

Lan berriak DVD bat ere badakar barruan. «Gor-ekoek esan duten bezala, gure bideoteka partikularra da. Kamera bat erosi eta zuzenekoetara eramatea otu zitzaidan, eta grabaketa horien emaitza da plazaratutakoa. Guztiz etxekoa da, beraz; guk geuk edo lagunen batek grabatutako irudiez osatua».

Aurrekoak bezala, azala bera ere kezkagarria du lanak, ikur komunista agertzen baitu, erdian mailu eta igitaiz egindako euroaren ikurra duela. Hori ikusita, McDonalds zabor-jan enpresa handiak diruz lagundu dituen galdetu diogu Ibarretxeri ausardiaz, eta horrela erantzun du berak: «oraindik ez, baina horretan gabiltza».

Ibarretxe auzia

Azken finean, ingurukoa kritikatu eta bere buruari barre egiten ere badakite iruindarrek. «Oinarrizkoa dugu autokritika egitea, eta horretarako erabiltzen dugu satira. Kritikatzen dugun guztiaren parte gara edo hurbiletik ezagutu dugu». Egun taldeak ez du hasieran lortutako harridura sortuko, baina «gure betiko maila mantentzen saiatzen gara».

Aitor Ibarretxe abeslariarekin batera, Asier Aguirre gitarra, Txema Garaikoetxea baxua eta Potxeta Ardanza bateria dira Lendakaris Muertos.

Ibarretxeren kontra jarritako salaketa aurrera doala eta, kantariari galdetu diogu zigortuko balute gertatuko litzatekeenaz. Ez kezkatzeko esan digu berak, «taldeak bermea ordaintzeko dirua lortzeko emanaldiren bat edo beste egingo baitu».

Kantuetan betikoa dute mintzagai, «euskal arazoa, drogak, benetako punkiak...». Hitzak idazteko ardo asko edaten duten susmoa dugula-eta, «garagardoa edaten dugu, eta gero eta gutxiago», harritu gaitu Ibarretxek. «Beti izan dugu gustuko leloak asmatzea. Taldea egin aurretik lagun koadrilan egiten genuen, manifetan eta. Gero, taldera ekarri dugu hori».

Aberastu eta nazioartera zabaltzeko asmorik baduten galdetuta, abeslariak aberats okituak direla esan digu, eta dagoeneko jo izan dutela nazioartean, Andaluzian, Galizian, Katalunian eta Madrilen. Hurrengo pausoa Latinoamerika litzateke, baina ez omen dute asmorik, «oso arriskutsua dela esan digute-eta». Ika-mikaren bat edo beste ere izan dute, tartean abertzale sutsuren bat edo besterekin, «Izan da gu jipoitzeko saiakerarik, baina gauza gutxi, orokorrean jendeak umore ona duela erakutsi izan baitu».