Horrelakoa da futbola. Bospasei hilabetetan larri ibili ondoren, ametsen txanda heldu dela dirudi. Otsailean Villarrealen aurka galdu ondoren, Athletic denboraldiko boladarik onenean sartu da: hiru garaipen eta bi berdinketa eskuratu ditu eta, horren ondorioz, jaitsierako postuetatik urrundu eta Europako postuetara gerturatu da.

Azken urteotan hain une latzak bizi ondoren, gogoak ere zerikusi handia dauka UEFA jokatzeari buruz esaten ari diren guztiarekin. Baina zenbakiei soilik jarraituz ere, argi dago helburu eskuragarria dela, beti ere bilbotarrek azken asteotako ibilbideari maiatzera arte eusten badiote.

Athleticen, hala ere, ez dute horrelakorik entzun ere egin nahi. Everesteri ere urratsez urrats egin behar zaio, eta filosofia horri jarraitu nahi diote zuri-gorriek; alde batetik partidaz partida jokatuz eta, bestetik, helburuz helburu pentsatuz. Mailari eustea da, beraz, beraien helburu bakarra, oraingoz.

«Egia da zazpi puntutako abantaila daukagula jaitsierako postuekiko, baina jarraipena oraindik ez dago matematikoki ziurtatuta», gogorarazi zuen Javi Martinezek atzo. «Gainera, bi urte oso gogorrak bizi ondoren, bete beharreko helburua denboraldia lasaitasunez amaitzea da», gaineratu zuen. «Eguneko helburua -esan zuen Igor Gabilondok ere- atzetik dauzkagun taldeak urruntzea da eta, batez ere, mailan jarraitzea ziurtatzen duten puntuak lortzea».

Ibilbide kontrajarriak

Lasaitasun horrek ez du, baina, inolako aukerarik ukatzen. Izan ere, Espanyol gaindituz, «43 puntu izango genituzke eta, mailan jarraitzearen muga zehazki non egongo den ez dakigun arren, badirudi salbatuta egon gintezkeela», onartu zuen Gabilondok. Eta, noski, epe berri bat zabalduko luke Athleticek. «Ezin diogu ezeri uko egin», aitortu zuen Javi Martinezek.

Etorkizunean zer gerta daitekeen ez jakin arren, argi dago igandekoa aukera ezin hobea izan daitekeela lehen muga horretara heltzeko. Horrela diote, behintzat, Athletic eta Espanyol azken aldi honetan gauzatzen ari diren ibilbide kontrajarriak. Talde bilbotarrak azken bost asteotan garaipenak eta berdinketak besterik lortu ez dituen bitartean, Ernesto Valverderen taldea denboraldi hasiera ikusgarrian eskuratutakoa gutxinaka-gutxinaka galtzen ari da, hamaika jardunalditan zortzi porrot jaso ondoren.

Zoritxarrez, hurrengo aurkariak une askoz hobeak bizitzen ari dira eta, beharbada, horregatik nahiago dute bilbotarrek amets handirik ez egin. «Oso egutegi gogorra daukagu» onartu zuen Javi Martinezek, Athleticek oraindik Espanyol, Deportivo, Valencia, Real Madrid, Mallorca, Murcia, Racing eta Sevillaren aurka aritu behar dela gogoraraziz, «urratsez urrats» joatearen teoria indartzeko.