Oso ohikoa izaten ez den arren, Frontiseko Zaragoza Hiria Torneoaren final-laurdenak gaur arratsaldean jokatuko dituzte Aragoiko hiri horretan kokatuta dagoen José Garcés Kirol Zentroan. Jaialdia 17.00etan hasiko da eta kanporaketak hauek dira: Bengoetxea VII.a/Aritz Lasa, Camarero II.a/Gorriti, Arretxe/Antxia eta Nagore/Urdaniz. Zazpi euskaldun eta errioxar bat nor baino nor. Partida horiek aitzakiatzat hartuta, hitz batzuk egin ditugu orain dela urtebete eskas debutatu zuen Aritz Lasa aurrelari urretxuarrarekin.

«Binaka jokatzen ibili eta gero, buruz buru jokatzeko entrenamendu gehiegirik gabe iritsi naiz lehiaketara, baina badaukat gogoa zerbait egiteko. Azken txapelketa Nafarroako Lau eta Erdikoa izan genuen eta final-laurdenetan Arretxeren kontra galduta ez nintzen batere gustura gelditu. Frontoia ere ez da egokiena, arraro samarra da, lehorra gelditzen da eta Ibai Bengoetxea hazi egiten da horrelakoetan. Halere, harritu egin ninduen final-zortzirenetan Larramendiri hain argi irabazi izanak. Gu Iruñean entrenatzen gara eta Larramendi oso-oso ondo zebilen», aitortu digu Lasak.

Orokorrean hartuta, denboraldi bikaina osatzen ari da urretxuarra, eta Frontisen rankingean bigarren dago 138 punturekin Ander Antxiaren atzetik. «Txapelketa guztietan aurrean ibili naiz eta buruz buruko lehiaketetan puntu gehiago ematen dituztenez eta Logroñon finalera iritsi nintzenez, nahiko aurrean nago. Binaka zertxobait gehiago egin nezakeen, baina ez naiz kexatzen».

Aurrera, bai bera eta bai enpresa

Azken asteetan Frontisek bizpahiru pilotari berri fitxatu dituela jakin dugu, Beñat Mitxelena -Arantzakoa, 21 urte- edota Iker Huarte -lazkaotarra, 24 urte-, esaterako. «Jende berria eta gaztea. Apustu hori egiten ari da enpresa. Aspen edo Asegarcen lekurik ez duten pilotariak badaude, Iñaki Esain adibidez, eta uste nuen agian horietakoren bat lotuko zutela, enpresari izena emateko, baina enpresak nahiago du pilotari gazteen alde egin eta ongi iruditzen zait, sartzen direnak gogo handiz sartuko direlako», azaldu digu.

Koadroan pilotari euskaldun mordoa izan arren, azkenaldian Frontis gure mugetatik kanpora ari da oihartzun handiagoa lortzen. «Kanpora joan beharrak pereza pixka bat ematen du, nahiago genuke denok etxetik gertuago jokatu, baina hori da dagoena. Enpresarentzat gauzak ongi doaz Logroñon eta akordio bat lortu zuten Udalarekin 25-30 bat jaialdi antolatzeko. Las Gaunasen, nahiz eta frontoi handia izan, jendea mugitzen da, baina Varea, La Estrella eta horietan ez hainbeste. Zaragozan ere ez da jende gehiegi ibili. Baina Asperi edo Asegarceri ere asko kostatzen zaie jaialdietara jendea eramatea. Ez da erraza».

Onartu digunez, berak ere bere jokoan aurrerapausoak eman ditu. «Maiatzaren 4an beteko dut urte bat profesionaletan eta balantzea ona da. Aita partida guztietara nirekin etortzen da eta esaten dit hobekuntza nabaritzen dela. Afizionatuetan beti irabazi beharraren presio hori neukan, eta zaila da beti ongi egotea. Orain, jaialdi arruntetan, lasaiago jokatzen dut lehen baino».