Aurreko hiru edizioetan egin bezala, aurtengo Mundumira jaialdia mundu osoko kulturen topagune izango da. Bergaran izango da aurtengo hitzordua ekainak 6, 7 eta 8an -aurreko edizioak Arrasaten, Oñatin eta Aretxabaletan izan ziren-.

Munduko Kulturen Festa Euskal Herria aldizkariak antolatu ohi du, eta bertan bat egingo dute, besteak beste, musikak, naturak, zirkoak, kale ikuskizunak eta mundu osoko hainbat zaporek.

Egitarau oparo eta luzea atondu dute beraz, festa «irekia» izateko helburuarekin eta, batez ere, «mundua Bergarara ekartzeko» nahiak bultzatuta, Euskal Herria aldizkariko Kike Zinkunegik Donostian egin aurkezpenean azaldutakoren arabera.

Orotara sei mendi martxa; beste bi mendi martxa bizikletaz; Debagoienan zeharreko 20 bisita gidatu; eskulangintza, jaki eta bestelako 120 bat postu, eta kontzertu ugari antolatu dituzte. Bulder -harritzarrak eskalatzea- txapelketa ere antolatu dute aurtengoan eta, lehen aldiz, Topagune Solidarioa ere egingo dute, hau da, Gobernuz Kanpoko Erakundeen gunea, non hitzaldiak, erakusketak eta bestelakoak ere egongo diren.

Xedea munduko kultura desberdinek Bergarako kaleak hartzea izaki, askotariko ekintzak izango dira ikusgai; musikaz, gastronomiaz eta naturaz gain, budismoa zertxobait hobeto ezagutzeko aukera ere izango da Tibetetik etorriko den monje talde baten eskutik, jaialdia hasi eta hiru egun lehenagotik otoitzerako erabiltzen duten mandala egiten hasiko direnak. Era berean, sufismo korronteko Kairoko dervitxeen saio ikusgarriarekin gozatzeko parada ere izango da.

Horrekin guztiarekin batera, aurtengoan kale ikuskizun ugari aurreikusi dituzte topagune honetarako, hala nola: Alkora perkusio taldea; Balkanetako musika eta zirkua bat egiten duen Tandarica Orkestar; Salam! kalejira; edota Artea Teatroren «Los Naribol» obra. Lehen aldiz, gainera, «Beste errealitate batzuk» izenarekin, film laburraren zikloa ere antolatu dute. Hori guztia bost gunetan sailkatuko da Gin Tonic Producciones-eko buru den Sergio G. Cruzadok esan zuenez. Musika kontzertu ia guztiak San Martin Agirre plazan izango dira; herriko ikastolaren patioan, berriz, bi gune egongo dira, batek kale ikuskizun batzuk bilduko ditu, eta bestea GKEen gunea izango da; kalea hartuko duen Eskulangintza Azoka izango da beste bat, eta herriko frontoia azkena. Munduko Zaporeak, berriz, Domingo Irala kalean kokatuko da.

Musika

Musikari erreparatuta Boli Kostako Alpha Blondy da, beharbada, izenik ospetsuena.

Bob Marleyrekin batera reggae erritmoan munduan ezagunena den taldeak 2007ko azaroan kaleratutako «Jah victory» diskoa aukeztuko du jaialdiko lehen egunean, ekainak 6, ostirala, 22.30ean. Izan ere, reggae gaua antolatu dute jaialdiko musika saila irekitzeko eta Alpha Blondy taldearekin batera Euskal Herriko Revolutionary Brothers ariko da (21.00).

Larunbatean berriz, gero eta ezagunago egiten ari den Herbeheretako eta Erresuma Batuko Tasha's World izango da bertan (21.00). Soul eta musika beltza egiten du taldeak. Ondoren, 23.00etan fusioa egiten duen Kataluniako 08001 taldeak eskainiko du kontzertua. Gaua DJ Florok -soul, rithm&blues eta musika etnikoa- itxiko du, San Martin Agirre plazan.

Igandean Asíkides Greziako taldeak eskainiko du kontzertua, 18.00etan.

Aipatu behar da Mundumira jaialdiko ekintza guztiak doakoak direla. Antolatutako jarduera guztien xehetasunak www.mundumirafesta.com webgunean kontsulta daitezke.