Herrerosek 2005eko liga «ostu» zionetik hona, Tau Baskoniak larregi sufritu du neurketa amaiera estuetan. Atzo, bere historiari buelta eman zion behingoz, eta bukaerako 25 segundo magikoei esker, ostegunetik aurrera Axa Bartzelonaren aurka finala jokatzeko txartela lortu zuen Tau Baskoniak. ACB Ligako bere bosgarren finala jokatuko du talde euskaldunak.

Has gaitezen amaieratik. Hara non, 25 segundoren faltan, Ndongek bi jaurtiketa libre sartu zituen: 80-76. Partidak galduta zirudien baskonistentzat, eta tira, hainbesterako ere ez zen izango, berdinketa hausteko bihar etxean jokatuko baitzukeen talde gasteiztarrak. Baina ez zen hala izan. Fedeari, kalitateari eta, batez ere, nortasunari esker, 2-7ko partziala lortu zuen. Rakocevicek «bi gehi bateko» jokaldia egin zuen, baina ez zuen jaurtiketa librea sartu. 80-78. Hala ere, errebotea kanpo erdian arabarrek kontrolatu zuten. Dena den, Berni Rodríguezek Prigioniri bultza egin eta kantxatik atera zuen: baloia etxekoentzat. Baskonisten falta azkarra Rodríguezi, eta honek bi jaurtiketak saskira: 82-78, eta 18 segundo baino ez amaierarako.

Denak galduta zirudiela, zortzi metrotik Prigionik hiruko ikaragarria lortu zuen: 82-81. Unicajak, bederatzi segundoren faltan, baloia atera zuen, baita antolatzaile argentinarrak ostu ere. Amorós eta Arteaga epaileek izan ez zen falta adierazi zuten. Prigioni kalera, eta Davor Kusentzat bi jaurtiketa libre.

Mickealen lasterketa

Davor Kusi urduritasunak ez zion bakerik eman, ordea, eta jaurtiketa bietan kale egin zuen. Errebotea derrigorrezkoa zen eta, nahiz eta Splitter egon ez -epaileek «lan aparta» egin zuten brasildarra bost faltaz kalera bidaltzeko-. Teletovicek hartu zuen baloia eta segidan Pete Mickeali eman zion. Estatubatuarrak arrapaladan ekin zion kontraerasoari. Málagako jokalariak ez ziren hegalekoari falta egiten ausartu, bestela, bi jaurtiketa libre izango zituen-eta. Ez zuen zalantza egin Mickealek eta, taulaz lagunduta, ezinezkoa zirudiena egia bihurtu zuen. 82-83, eta bi segundo jokatzeko.

Hutsartea eskatu zuen une horretan Sergio Scariolok, azken jokaldia beren saskipetik hasi beharrean kantxa erditik hasteko. Alabaina, gasteiztarrak ohartu ziren ordurako Unicajako entrenatzaileak laugarren laurdenerako zegozkion bi hutsarteak eskatuta zeuzkala. Beraz, atzetik ekin behar izan zion jokaldiari talde andaluziarrak. Carlos Cabezasek hartu zuen baloia eta Zoran Planinic gainean jarri zitzaion. Bi segundoak ez ziren berehala pasa, baina Marbellako antolatzailearen hirukoa ez zen saskira hurbildu ere egin. Besarkadak ez ziren txikiak izan, behingoan, neurketa amaiera estu batean arabarrak garaile atera baitziren.

Bestalde, hamar mila zaletu mutu utzi zituen Tau Baskoniak; izan ere, Unicajak 2006ko ACBko finala irabazi zionez gero, eta hamaika partida jokatu ostean, behin baino ez baitio irabazi talde gasteiztarrari. Ez zaie, ez, berehalakoan ahaztuko.

Partida zoragarria

Emaitza euskaldunen aldekoa zein aurkakoa izan, egia bat eta bakarra utzi zuen atzoko neurketak: talde bien ikaragarrizko kalitatea. Entrenatzaileak zein jokalariak jo eta ke saiatu ziren aurkariari aurrea hartu nahian eta, bistan denez, neurketa ez zen azken unera arte erabaki.

Oro har, markagailuan arabarrek izan zuten ekimen nabarmenagoa, baina abantaila handirik gabe beti ere. Rakocevicen eskutik, aurreneko zatia bikain jokatu zuen Tau Baskoniak, baina andaluziarrek ez zuten atzean geratu nahi eta euskaldunen kolpeei gogo biziz erantzuten zieten. Atsedenaldia iristear, gasteiztarrek bederatzi puntuko aldea hartu zuten, 37-46, baina azken minutuan 7-0ko partziala lortu zuen Unicajak neurketa ia berdinduta lagaz.

Bigarren zatia, aldiz, asko okertu zen Spahijarenentzat; Splitter eta Teletovicek, faltak zirela-eta, partidatik alde egin behar izan zuten eta, ondorioz, erraztasun gehiago izan zuten Haislip eta enparauek, eta aurrea hartu zuten etxekoek.

Spahija eta Scariolok 2-3 zona defentsa jarri zuten azken zatian, eta bazirudien italiarra gailenduko zela, baina bai zera! Baskonisten nortasunak erabaki behar zuen auzia.