Sagrario Aleman Astitz euskaltzain osoak sarrera-hitzaldia egingo du larunbat honetan Etxalekun, Dorrotoa izeneko etxean, 11:00etatik aurrera, Euskaltzaindiko iturriek prentsa ohar bidez atzo jakinarazi zutenez. Maria Antonia Iribarren Imozko alkatearen ongietorriarekin hasiko da egitaraua. Andres Urrutia euskaltzainburuaren agurraren ondoren, Sagrario Alemanen «Berdetik horira» izenburuko sarrera-hitzaldia eskainiko du. Patxi Salaberri euskaltzainak erantzungo dio gero, eta euskaltzain berriak domina eta diploma jasoko du. Amaitzeko, Juan Manuel Facenda Etxalekuko alkatearen hitzak entzuteko parada egongo da.