Ez zen ezusterik izan, eta Floren Nazabalek berriro ere Urrezko Aizkorako txapela eskuratu du. Atzo lana egin behar izan zuen Donato Larretxea menderatzeko, baina Etxarrikoak bete zuen bere helburua.

Jende ugari batu zen atzo Azpeitira, Izarraitz pilotalekuan finala ikusteko asmoz; seiehun ikusle inguru izan ziren, eta jende gazte ugari izan zen harmailetan.

Aizkolariak, 45 ontzakoa zeinek kolpe gutxiagotan moztu hasi ziren, eta Larretxeak lortu zuen garaipena; 32 kolpetan erdibitu zuen enborra, eta baten aldea kendu zion Nazabali.

Bigarren lanean tamaina bereko enborrarekin erloju kontra koan neurtu ziren, eta hor txapelduna atera zen garaile, 42 segundotan moztu baitzuen enborra eta hiruren aldea atera zion Larretxeari. Hirugarrengoan, kana-erdikoa zutik zuten mozteko, eta Larretxeak bereganatu zuen saio hau, minutu eta 38 segundotan bota baitzuen enborra, eta minutu eta 50 segundotan Nazabalek.

Atzoko finaleko gakoetako bat, ordea, 60 ontzakoan egon zen, Donatok ez baitzuen epaiarekin asmatu, eta hor Nazabalek aldea kendu zion. Minutu eta 48 segundotan bota zuen enborra txapeldunak, eta aurkariak, berriz, bi minutu eta bederatzi segundotan.

Arriskatu beharra

Bi lan besterik ez ziren geratzen, eta Larretxeak arriskatu beharra zeukan. Azken-aurreko lana egokia zen berarentzat, 45 ontzako bat zutik, eta beste bat etzanda moztu behar baitzuten, baina gauzak ez zitzaizkion ongi atera.

Proba honetan ere Floren atera zen nagusi, nahiz eta segundo bakar bateko aldea egon zen. 2 minutu eta 23 segundo izan zen bere denbora. Beraz, iraupen proba bakarrik falta zen, eta Nazabalek dena zuen alde. Saio horretan, lau kana-erdiko eta bi 60 ontzako moztu behar zituzten. Larretxeak oso indartsu ekin zion, aurretik ibili zen lan erdiak bitarte, baina gero jo egin zuen, eta Nazabalek ez zion barkatu. 13.38 izan zen bere denbora, eta 14.43, berriz, Donato Larretxearena. Lan guztiak burutzeko, berriz, 20 minutu eta 54 segundo behar izan zituen Floren Nazabalek, eta 22 minutu eta 11 segundo, berriz, Donato Larretxeak.