Iruñeko Jaso ikastolako ordez-kariak pozik agertu ziren atzo Nafarroa Oinez-erako prestatu dituzten abesti eta bideo-kliparekin. «Atera ezazu mihia» izan da aukeratutako leloa: jendea euskaraz mintzatzera animatu nahi dute alde batetik; bestetik, berriz, gustukoa ez den horren aurrean egiten den keinu bihurria adierazi nahi izan da. Jolas horren atzean ordea, esanahi zabala dago, eta halaxe azaldu zuen atzo Zaldi Zurian egindako agerraldian Edu Zelaietak, letraren egileak.

Zelaieta, idazlea eta EHUko irakaslea, iaz Jaso ikastolan aritu zen eskolak ematen, eta azaldu zuenez, «ikastolaren ondoan dagoen Miluze zubitik abiatu nintzen. Urak, zubiak eta mihiak bat egiten duten toki enblematikotik. Arga ibaia eta Iruñea solasean ari ziren, elkarrekin». Hortik etorri omen da kantuaren letra: «Oineztarren hiriak hitz egin nahi baitu, bihotzez mintzatzeko mihia atera du. Arga lagun zaharrari omen dio eskatu: Iruñeko bazterrak lorez zipriztindu». Iruñea Nafarroaren bihotza dela, eta Nafarroa «bihotz-begietan» daramagula ere badio kantuak. Ibaien eta zubiaren metaforatik abiatuz, «hizkuntzak -mihiak- bidaiatzeko ibaiekin alderatu eta zubiak harremanetarako beharrezkoak» direla adierazi nahi izan du. Iñigo eta Imanol Goikoetxea anaiek jarri diote musika, eta melodia ia-ia berez etorri dela adierazi zuen atzo Iñigok.

Bideoklipak ere beste hainbeste sentipen islatzen ditu. Euskara alaitasunarekin eta ikasketa jokoarekin lotzea, jendea mihia ateratzera -euskaraz aritzera- gonbidatzea, hiriko txokoak erakustea, Iruñeak biltzen duen hiritasun eta naturgunearen arteko kontrastea, berrikuntzak eta antzinako ohi- turak lotzea, kultura aniztasuna, bizitasuna eta Nafarroa Oinez-en logoa indartzea; kolore arrosa mihia irudikatuz eta berdea berriz, Iruñea oroituz.