Indiako Parlamentuak «terrorismoaren aurkako legeak» gogortzeko eztabaida hasi zuen atzo. Honez gain, AEBetako FBIren tankerako Polizia federal bat sortzeko asmoa dute, Mumbaiko atentatuak jazo eta hiru aste pasa direnean.

«Terrorismoaren» aurkako legeen gogortzeko Indiako Gobernuak aurkeztu duen lege egitasmoak herrialde honetako prentsaren haserreari aurre egitea du helburu. Izan ere, azaroaren 26 eta 29 bitartean 163 hildako eragin zituzten Mumbaiko atentatuei aurre egiteko segurtasun indarrak ez zirela gai izan nabarmendu du egunotan Indiako prentsak.

«Onartzen dugu: informazioa jaso eta banatzeko garaian arazoak izan ditugu. Dagokigun ardura gure gain hartzen dugu eta arazoa konpontzeko prest gaude», adierazi zuen Barne ministro Palaniappan Txidambaramek Parlamentuaren aurrean.

Gauzak horrela, aurrerantzean «terrorismoagatik» atxilotutakoak 180 egun eduki ahal izango dituzte Poliziaren eskuetan, lege berrirako proposatutakoari jarraituz. Une hauetan, 90 egunetan dago muga hori. Diru zuritzea eta susmagarriak diren transferentzien aurka egiteko ere neurriak onartuko ditu Indiako Parlamentuak. «Oso garrantzitsua da terrorismoaren finantziazioa kolpatzea», adierazi zuen Txindabaramek.

Esan bezala, Ikerketarako Agentzia Nazionala (NIA, ingelesez) indar poliziala sortuko dute Indian, AEBetako FBI eredutzat hartuta. AEBak bezala, India ere estatu federala da. 29 estatuk eta hainbat lurraldek osatzen dute Indiako Errepublika.

Polizia honen sorrera iraultza izango da Indiako erakundeetan. Orain arte, Indiako estatuek segurtasun alorrean duten burujabetza sutsuki defendatu dute, indar polizial federal baten aurrean.

Espioitza lanetan aritzen diren IB eta RAW erakunde federalak ere jeloskor azaldu ziren.

Txindabaramek, ordea, polizia berri honen sorrera ezinbestekotzat jotzen du, «terrorismoarekin lotura duten ikerketak eta jarduerak eraginkorragoak izan daitezen».

«Estatuetako gobernuen eta Gobernu federalaren betebeharren arteko oreka lortu dugu», gaineratu zuen Barne ministro federalak.

Joan den astean, orain Parlamentuan eztabaidatzen ari diren neurriak aurkeztu zituenean, «aurrean dugun mehatxua zein mailakoa den kontuan izanik, ezin dugu gure ohiko zereginetara itzuli ezer gertatuko ez balitz bezala», bota zuen Txindambaramek.

BJPren eskaerak

Oposizioan nagusi den Bharatiyah Janata Party (BJP) eskuineko alderdi ultrahinduistak «printzipioz» Gobernuak aurkeztu dituen neurriekin ados zegoela esan bazuen ere, egitasmo hau aztertu ahal izateko Parlamentuko batzorde batera igortzeko eskatu zuen alderdi horren buru L.K. Advanik.

Advanik Kongresuko Alderdiaren (sozialdemokrata) Gobernuari leporatu zion BJP agintean zegoenean onartutako «terrorismoaren aurkako legea» (POTA izenekoa) indargabetzea. «Zazpi edo zortzi urte behar izan dituzte neurri hauek beharrezkoak zirela ikusteko», adierazi zuen.

Kongresuko Alderdiko kide eta Zientzia ministro Kapil Sibalek POTA ez zela egokia jakinarazi zion Advaniri, 2002. urtean Gujarat estatuan muturreko hinduistek musulmanak hiltzeko erabili zutela nabarmenduz. «Gurea ez da POTA berri bat», gaineratu zuen.