Finalerako sailkapenaz gain, norbanakoen historian lekutxo bat egitearren lehia bikaina izango dute Sergi Vidalek eta Juan Carlos Navarrok, Baskonia eta Barcelonako kapitain eta hegalekoek. Askorentzat aurreratutako final itxura duen gaurko partidan bi kataluniarrek gaur egungo ACB Kopako partidarik gehien jokatu duen jokalaria izatea lor dezakete -biek hogeina jokatu dituzte-, eta bide batez, titulurik gehien irabazitakoa izateko ere urrats handi bat emango luke irabazle suertatzen denak, biek hiruna Kopa irabazi baitituzte -2002, 2004 eta 2006an Vidalek eta 2001, 2003 eta 2007an Navarrok-.

Biek postu berean jokatzen duten arren, jokatzeko era oso desberdinak dituzte eta, orokortzearen arriskuak arrisku, bakoitzak bere taldearen izaera gorpuzten duela esan genezake. Sergi Vidal Dusko Ivanovicekin batera heldu zen Gasteizera Badalona utzita, eta haren eskutik hazi dela esan dezakegu, kantxan Montenegrokoak eskatzen duen intentsitate, defentsa eta grinaren erakuslerik argiena baita, kalitate zipriztin batzuez ondo apainduta. Hitz gutxitan esanda, «Baskonia izpirituaren» ikurra da kapitaina.

Kopan orain arte egindako bere zenbakiak, 3,8 puntu eta 2,2 errebote 15,5 minututan, ez dira txundigarriak, baina bere lana funtsezkoa izan da taldeak azken urteetan lortutako balentria guzti-guztietan.

Navarrok ere primeran islatzen du gaur egungo Barcelonaren izaera, kalitatea soberan, baina sendotasun eta jarraikortasun puntu bat falta zaio eman dezakeen guztia emateko. NBAn egindako proban ere, gauza txundigarriak egin arren, lehen urtean etxera itzultzea erabaki zuen. Barcelonako jokalariaren kasuan, ia hirukoiztu egiten ditu Vidalek sartutako puntuak eta gaur egungo jokalarien artean hiruko jaurtiketarik gehien sartu dituena ere bera da.

Finalerdietako partidak, gainera, une gozoan harrapatzen ditu bi jokalariak, izan ere, bakoitzak bere taldean duen garrantziarekin, funtsezkoak izan baitziren final-laurdenetako partidetan. Ohikoegia ez den arren, bolada bikainean den Vidalek 18 puntu egin zizkion Pamesari, 22ko balorazioarekin, eta Navarrok 19 egin zituen Real Madrilen aurka.