Zigoitiko herriak jaso zuen atzo Arabako Bertsolari Txapelketako lehen finalaurrekoa eta, lehia estu baten ostean, Manex Agirrek lortu zuen finalerako txartela, 334 puntu eskuratu ostean. 130 lagun inguru bildu ziren Zigoitiko kultur etxean azken-aurreko fase horretan gertatzen zena zuzenean jarraitzeko.

Epaimahaiaren arabera Agirrerena izan zen jardunaldiko lanik txukunena, baina bertsolariak lehiakide gogorrekin lehiatu behar izan zuen azken helburua lortu aurretik. Bere atzetik, bigarren postuan, Iñaki Viñaspre sailkatu zen, 326 punturekin; ondoren, Rikardo Gonzalez de Durana, 313rekin; Juan Mari Juaristi, 311rekin; Izar Mendiguren, 298,5ekin; eta, Serapio Lopez, 260rekin.

Finala erabaki gabe

Atzoko lehiaren garaile izaki, Manex Agirrek zuzenean lortu du Gasteizen jokatuko den finalerako sarbidea. Nolanahi ere, gainontzeko bertsolariek oraindik aukerak badituzte azken zitan leku bat lortu eta txapelerako lehian berriro sartzeko. Horretarako, baina, Aramaion egingo den bigarren finalaurrekora arte itxaron beharko dute. Kanporaketa hori datorren igandean ospatuko da, 17.00etan, herriko kultur etxean. Bertan, Asier Otamendi, Zigor Enbeita, Andere Arriolabengoa, Ruben Sanchez, Oihane Perea eta Xabi Igoa bertsolariek parte hartuko dute.

Azken finalaurreko horretan garaile suertatzen den bertsolaria soilik sartuko da zuzenean finalean. Gainontzeko txartelak finalaurrekoan parte hartu duten bertsolari guztien artean banatuko dira, saioan lortutako puntuazioaren arabera. Arabako Bertsolari Txapelketako azken lehia Gasteizen jokatuko da, apirilaren 4an.