Saskibaloi adituek diotenez, porrot mingarri baten ostean gerta daitekeen gauzarik onena aurkari berberaren kontra ahalik eta arinen jokatzea da. Teoria horren arabera, porrota jasan duen taldeko jokalariak minduta eta gogotsu kantxaratzen dira eta ez dute baloi bakar bat galdutzat jotzen eta, hala, «mendekua» erdietsi arte ez dute atsedenik hartzen.

Hori horrela baldin bada, Tau Baskoniak osteguneko porrot mingarria erabili behar luke gaur arratsaldeko partida erabakigarrian irabazle ateratzeko aurreneko pauso gisa. Duten mailaren oso azpitik ibili ziren Prigioni, Rakocevic, Mickeal eta enparauek osteguneko arantza baliatu behar dute Real Madrilen aurka ACB Ligako finalerako txartela lortzeko.

«Jokalari bakoitzaren balioa erakutsi behar dugu berriz», adierazi zuen Dusko Ivanovicek osteguneko belarrondokoaren ostean. Josean Kerejeta Saski Baskoniako presidentearen hitzetan ere, «onartezina» izan zen bere taldeak Madrilen erakutsitako itxura tristea. «Talde honek ezer badu, hori izaera da. Buelta eman behar diogu egun txar horri», gaineratu zuen.

Bestalde, kontua ez da epika hutsera mugatu behar. Ligako partida guztiak irabazi ditu Tau Baskoniak etxean eta, tira, ez dago inolako arrazoirik gaur arratsaldean emaitza on hori errepika ez dadin. Gainera, prentsa ohar baten bitartez, Saski Baskoniak beren zaleei gaur Zurbao «janzteko» deia egin die; horretarako, ikusleei partidara Tau Baskoniaren bufandak eta kamisetak jantzita joateko eskatu die.

Kantxarik ez, dirurik ez

Gasteizen urak harro xamar badoaz Real Madrilen aurkako finalerdia dela eta ez dela, Bilbao Basketen inguruan ere bada nahikoa zalaparta bilbotarrek datorren denboraldiko neurketa guztiak Barakaldoko Bizkaia Arena pabilioian jokatzeko azaldu duten asmoa dela eta.

Hala, Bilboko alkate Iñaki Azkunak bota zuen atzo auzi honen inguruko azken hordagoa, Bilbao Basket Barakaldora joanez gero, «Bilboko Udalaren diru-laguntzarik gabe» geratuko litzatekeela adierazi baitzuen.