Trikitia eskuetan, musikari iaio eta ikusgarria da Kepa Junkera, eta egitasmo berriak aurkeztu eta bide berritzaileak ibiltzen ere ez da atzean gelditzekoa, aurkezpenei dagokienean behintzat, eta atzo «Fandango Provença Sessions» bildumaren berri eman zigun errekaldearrak, Guggenheim Museoan.

«Etxea» egitasmo erraldoiaren lehen atala itxi eta bigarrena prestatzeko pausuak ematen dabilela (diru-laguntzek sortu kalapita tartean), atseden hartzeko geldiunetxoa egin eta Melonious Quartet soka taldearekin plazaratu bilduma dugu «Fandango Provença Sessions», Errekaldeko trikitilariak orain arte plazaratutako diskoetan ageri diren hamalau kantu aukeratu eta berrirakurrita.

Sorta baten hasiera

Kepa Junkerak sorta berri baten hasiera dakar Melonious Quartet taldearekin prestatu lanarekin. «Fandango» izenburupean, munduan barreiaturik diren musika tresnekin uztartu nahi du trikitia, eta sonoritate berri batekin diskoak plazaratu.

Sortako lehena da, beraz, «Fandango Provença Sessions», «mandolinen soinu indartsuak betidanik erakarri bainau». Errekaldearrarentzat, «trikitiaren eta mandolinaren soinuak bikain egin dute bat» eta modu horretan, «aspaldiko ametsa gauzatu dut». Gainera, sorta berri honek bere lanak «berpiztu eta berreskuratzeko» balioko dio Junkerari, «ñabardura eta bihurgunez beterik» daude-eta. Konponketa, harmonia, detailea... «Elkarketa hauek aberastasun artistiko ikaragarria ematen diote nire musikari eta esperientzia profesional eta pertsonal interesgarriak dira niretzat».

Esperimentua honetarako, eta behin euskal kantu tradizional batzuk hautatuta, Melonious laukoteko gidari Patrick Vaillant arduratu da hauek moldatu eta berrirakurtzeaz, «mandolinekin dimentsio berri bat emanda», proventzar ukituarekin. Junkeraren ustez, «tresna tradizionalak jotzen dituzten arren, musikari bide berriak ireki eta soinu berrien bila» aritzen den taldea da Vaillantek zuzendu laukotea.

Mandolina eta trikitia uztartzearen emaitza, diskoan ez ezik zuzenean ere entzun ahal izango da, Junkera bira egitekoa baita Melonious Quartetekin. Atzo, goizean lana aurkeztu ostean arratsaldean Guggenheim Museoan jo zuten, eta gaur Ataunen jo ostean, bihar Hernaniko Chillida Leku Museoan izango dira. Ekainaren 25ean, Consorcio eta Oskorrirekin batera Bilbon ongintzazko kontzertua eskainiko dute eta uztailaren 8an, Iruñeko San Fermin jaietan joko dute.

Eta uda ostean, azaroan itzuliko dira hurrengo, proventzar laukotea lanez lepo ibiliko baita uda partean, batean eta bestean jo eta jo.