Kazeta.info-k eta Euskal Herriko Kazetak agertutako informazioaren arabera, jarraipenik izango ez duen 2x2 egitasmoa bertan behera gelditu da. Iruñea eta Biarnoko Salis elkartzekoa zen bidea gizartearen eta hautetsien aurkakotasunaren ondorioz utzi da bertan behera. Egitasmoaren kontra sortu zen Nafarroa Behereko Leia elkarteko Daniel Olçomendik «geroari buruzko borroka historikotzat» jo zuen garaipena.

Nafarroako Gobernua hasieran ezeztatzearen kontra agertu bazen ere, Bartelemy Aguerre kontseilari nagusiak esandakoaren arabera, bi erakundeek 2003ko martxoan onartutako hitzarmenaren ezeztapena berretsi dute.

Paueko eta Bordeleko kontseilari Frantxua Maitiak egitasmoa ez dela «beste era batean» agertuko adierazi zuen, «behin betiko bukatu da». Etorkizuneko egitasmoen inguruan Aguerreren hitzetan, «beste egitasmo mota batzuk egon daitezke, baina biztanleek nahi badute». Daniel Oçomendik, bestalde, nabarmendu nahi izan zuen beraien elkartea nazioarteko kamioi bide baten kontra dagoela, «ez komunikazioaren aurka».

Egitasmoaren garapenerako azterketak gauzatzeko ia bi milioi euro erabili behar izan ditu Pirinio Atlantikoetako kontseiluak. Nafarroako Gobernua, bestalde, egitasmoa gauzatuko ez zela ikusita, Iruñea eta Luzaide arteko bidea hobetzen ari da, bertako bizilagunen eskaerei jarraiki.