Airetik begiratuta, lokatzezko itsaso baten itxura zuen atzo Manila Filipinetako hiriburuak, teilatuetan babesa bilatzen zuten biztanleek osatutako uharte txikiz betetako itsasoa.

Hildakoen kopurua 144 lagunetik gorakoa da eta 300.000 pertsonak baino gehiagok babes bila ihes egin behar izan dute, azken lau hamarkadetan pairatutako ekaitzik bortitzenaren ondorioz.

Soilik sandalia eta praka motzak jantzita zituen gizonak eusten zuen paperezko orrian, bi hitz irakur zitezkeen atzokoan: «janaria» eta «ura».

Manila eta inguruetako bizilagunek ez zuten aukerarik izan laguntzaren zain gelditzeko, eta urez gainezka zeuden bideak gurutzatzeari ekin behar izan zioten, seme-alabak eta euritearen ondoren onik gelditutako ondasun urriak lepoan hartuta.

Auto baten teilatua txalupa inprobisatu moduan erabiltzen zuten gizonak, soka baten laguntzarekin saiatu ziren duela egun batzuk arte kale izandakoak gurutzatzen.

Hondamendia nagusi da 12 milioi biztanle dituen hiriburuko auzo batzuetan. Bertako Gurutze Gorriko arduradun Gwendolyn Pangek azaldutakoaren arabera, auzo horien gainazalaren %80 urpean gelditu da.

Manilarren eta animalien gorpuak ur gainean ikus zitezkeen atzo, eta salbamendu lanetan ari ziren ontziek «slalomak» egin behar zituzten hondakinen artean.

«Ketsana» ekaitzak Manilan eragin zuen kalte gehien eta, hiriburuko zenbait puntutan, ura sei metroko mailara iritsi zen.

Rachelle Solis banketxe bateko arduradunak eta bere bi seme-alabek -6 eta 8 urtekoak- tragedia ekidin zuten, hiriburutik alde egitea lortu zutelako. Ur gainean luzatutako soka bat izan zen salbatzeko izan zuten bide bakarra. «Korronteari aurre egitea beste irtenbiderik ez genuen izan. Ez genuen laguntzaren zain gelditzerik», azaldu zuen Solisek behin arriskutik kanpo zela.

«Gure azken uneak zirela uste genuen. Nire seme-alabek ez zioten negar egiteari uzten. Hain zen indartsua korrontea, ezen seme-alabek gogor oratu behar baininduten... Gainera, urak zekartzan hondakinek kolpatu egiten gintuzten», azaldu zuen bizitako une latzak gogora ekartzerakoan.

Salbamendu lanak atzo gauerako amaituta egotea nahi zuten agintariek. Hala ere, ez zen posible izan eta, gaua iristean, biztanle asko urez gainezka zeuden auzoetan harrapatuta zeuden oraindik ere.

«Uholderik suntsitzaileena»

«Manilan ikusi ditudan uholde guztien artean suntsitzaileena izan da hau», azpimarratu zuen Dave Barnuevo Gurutze Gorriko boluntarioak. «Ur guztia hiriguneetatik ateratzeko denbora asko beharko da. Lokatzaren eraginez hainbeste loditu da ura, ezen puntu askotan pneumatikoak ura lepora arte genuela bultzatu behar izan ditugula», azaldu zion France Presse informazio agentzia frantsesari.

Hiriburuan, laguntzaile taldeek ume baten gorpua atera zuten basaren artetik. Beste bi hildakoren gorpuen ondoan jarri zuten, senideak identifikatzera hurbiltzeko zain.

Gertatutakoaren ondoren, Manilan eta denboraleak kaltetutako beste 25 probintziatan hondamendi egoera ezarri dutela azaldu zuen Defentsa ministro eta Hondamendien Koordinaziorako Nazio Kontseiluaren presidente Gilberto Teodorok.