Patxi Lopez lehendakariaren ustez, Euskal Autonomia Erkidegoan (EAE) «dagoeneko pasatu da lurrikara ekonomikoaren txarrena», artean ere «horren eraginak pairatzen» jarraituko badu ere. Hiru herrialdeetako ekonomiaren susperraldia 2012an kokatu zuen, orduan barne produktu gordina (BPG) %2 baino gehiago hazi eta langabezia nabarmen murriztuko baita, bere aurreikuspenen arabera.

Adierazpenok Euskalduna jauregian emandako hitzaldi batean egin zituen Lakuako Exekutiboko buruak, eta aurtengo bigarren seihilekoan urte arteko hazkunde tasa, txikia izan arren, positiboa izango dela iragarri zuen. Hazkunde murritza izango dela esan zuen, eta litekeena dela lanpostuen galera oraindik ez etetea.

Lan munduko aurreikuspen horiek bete ez daitezen «borrokatzeko» konpromisoa azaldu, eta honakoa gaineratu zuen: «Lanpostuak sortzen ditugunean baino ez dugu esango krisialditik irten garela». Hori 2012an izango dela berretsi zuen.

Hala ere, «lanik gabe egotea eta langabea izatea ez da gauza bera», Lopezen esanetan, eta argudio horrekin, prestakuntza beharrezkoa dela gogorarazi zien herritarrei, «lan merkatutik ez deslotzeko».

Era berean, lan erreforma bat bultzatzeko aukera baztertu zuen: «Kaleratzeak ugaldu baino lehenago beste formula batzuk bilatu behar dira, enplegua erregulatzeko espedienteak edo lanaren banaketa bezalakoak».

Bestalde, Araba, Bizkaia eta Gipuzkoako aurrezki kutxen fusioari buruz adierazi zuen, 2010 igaro eta gero, «krisialdia pasatzen denean, lasaitasun momentua egongo da fusioa arrakastarekin osatzeko».

Lan politika aktiboez ere hitz egin zuen. «Egutegirik ez» dagoela esan zuen, baina gaineratu zuenez, Lakuako Exekutiboa «eskumen hori lortu arte ez da geldituko», aurten lortzea espero baitute, azaldutakoaren arabera.