Riazorren irabaziz gero, Athleticek Europarako txartela eskaintzen duten postuetan emango dio amaiera lehen itzuliari. Joan den larunbatean egindakoari jarraipena ematen badio, helburu hori eskuratzeko aukera handiak izango ditu.

Horra ziurtasunak. Hortik aurrera, zalantzak. Lehenbizikoak Athletici berari dagozkie, aurrekariek ez baitute baikor izateko arrazoirik ematen. Orain arte, bilbotarrek ezin izan dituzte halako aukerak aprobetxatu eta, gainera, azken urteotan ez da batere arraroa izan ikusmina piztu duten sekulako partiden ondoren, tamaina berbereko deskalabruak egitea -jokalariek oraingoan nabarmendu dute, baina, arrisku hori baztertuta dagoela-.

Bigarren zalantza sorta, berriz, aurkariari dagokio. Denboraldi dotorea gauzatzen ari da Deportivo -bere bosgarren postua, adierazlerik onena-, baina azken egunotan bi jipoi jasan ditu, Mallorcaren aurka bere sailkapena indartzeko aukera galduz eta, asteazkenean, Kopako bidea izugarri ilunduz, Sevillak sartutako hiru golekin. Ikustear dago zuri-urdinek nola erantzungo duten, amorruz ala etsipenez.

Hirugarren zalantza da, azkenik, garrantzitsuena, eta partidari berari dagokio. Behin baloia jokoan ipinita, edozer gerta daiteke eta horretan datza kirolaren erakargarritasuna. Are gehiago kasu honetan, Europako lehiaketak jokoan egonda, eta argudio sendoak aurkeztu ditzaketen bi taldeak aurrez aurre egonda. Gainera, partida Riazorren jokatzeak indarrak parekatzen ditu, Deportivo indartsu baitabil etxean eta are indartsuago Athletic etxetik kanpo, azken bi bidaietan puntu bakarra lortu duen arren.

Bere ibilbidea, baina, ontzat hartu behar da, eta beraz, ez da iraultzarik egongo talde zuri-gorrian. Ustekaberik ezean, aldaketa bakarra, eta derrigorrez egin beharrekoa, egingo du gaur Joaquin Caparrosek, Markel Susaeta Carlos Gurpegi zigortuaren postuan kokatuz. Deportivori dagokionez, Lotinak ez du argitu bost atzelarirekin jokatuko duen -Sevillaren aurkakoan bezala- ala ohiko sistemara itzuliko den.

«Deskonektatu»

Caparrosi, dirudienez, ez zaio aurkariaren joko sistema gehiegi axola, edonola ere «oso partida zaila» espero baitu. Ezta galiziarren egoera animikoa ere. «Profesionalak dira eta badakite nola deskonektatu partida batetik bestera», esan zuen.

Zuri-gorrien entrenatzailearen esanetan, Deportivo «sekulako denboraldia gauzatzen ari da. Etxean, gainera, indartsu dabil: oso zaila da gola egitea eta beraiek, berriz, badakite aukera txikiena aprobetxatzen». Gainera, «oso ondo landuta dago, entrenatzaile bikain baten eskutik», gaineratu zuen.

Caparrosek, halere, ez du aurkaria bere taldearen gainetik jartzen. Atzo, behintzat, «oso parekatuta dauden talde bi» neurtuko direla esan zuen, eta «zelaiaren gaineko antolakuntzari dagokionez ere antzekoak» direnak.

Utrerakoak, azkenik, ez du uste azken egunotako zalapartak ondorioak ekarriko dituenik. «Taldeak hazten jarrai dezan baliagarria izango dela espero dudan arren, Real Madrilen aurkako garaipena ahaztu dugu dagoeneko -azpimarratu zuen Caparrosek-. Ulergarria da ingurukoak horrekin bueltaka egotea, baina profesionalak deskonektatu egin behar du partida amaitu bezain laster».