Italian, munduko izozki onenen herrialdean, iragan da berriki nazioarteko izozkigileen txapelketa. «Italia da izozkiaren tenplua», adierazi zuen Thierry Bamasek, diziplina horretan munduko txapela lortu berri duen txokolategileak.

41 urterekin, Angelun kokatu berria da, eta sari hori aipatzean harro agertzen da. «Bixkotx, txokolate eta izozki elaborazioan aditua naiz. Txapelketa horretarako Parisen gertatu den lehen selekzio batean parte hartu nuen eta aukeratu egin ninduten. Jadanik niretzat oso lorpen handia izan zen», erran zuen. Beste bi lankiderekin aritu zen lanean Bamas Italiako txapelketan, Estatu frantseseko ordezkari gisa.

«Zapore eta egitura askotako izozkiak aurkeztu ditugu», gaineratu zuen. Gaztea izanik ere, jakitate hori hamabost urteko esperientziari esker lortu du Bamasek.

Urte luzeko eskarmentua

«Hamabost urte daramatzat lehiaketetan parte hartzen. Eta, sari bakoitza profesio mailan lorpen handi bat da. Pasioa eta zure lana zaletasun duzularik munduko onenekin aritzeko gogoa pizten zaizu», nabarmendu zuen txokolategileak. Thierry Bamasek mota horretako beste hainbat lehiaketetan parte hartzeko gogoz jarraitzen du. Eta, jadanik Estatu frantseseko «langile onenaren» txapelketa prestatzen hasia da. «Bi urte daramatzat hori prestatzen. Gehien- bat teknikari eta lanbideari loturiko artea saritzen dute», bukatu zuen.