Bosniako serbiarrek egin zuten borroka «justua eta sakratua» izan zela nabarmendu zuen atzo Radovan Karadzic Jugoslavia-ohirako Nazioarteko Auzitegi Penala (ICTY siglak, ingelesez) beraren kontra egiten ari den epaiketaren hasieran. «Ez naiz munstro bat eta ez dago nire kontrako frogarik», gaineratu zuen Bosniako serbiarren buruzagi politikoa izandakoak.

Urrian egitekoa bazen ere, atzo ekin zioten berriro Karadzicen aurkako epaiketari, Hagan. Bertan, Bosniako serbiarrek ez zutela inoiz Jugoslaviatik banatu nahi izan, eta «musulmanekin bizitzen prest» zeudela esan zuen. «Baina ez genuen nahi bizi beraien menpe eta oinarrizko eskubideak bermatzen ez zituen errejimen batean», gaineratu zuen.

Serbiako Alderdi Demokratikoko buru (SDS) izandakoak argitu zuen epaiketan ez zuela bere burua defendatzeko hitz egiten, «nire aberritxo handiaren alde egiteko baizik».

Beste behin, Hagako akusatuen aulkian izatearen errua «nazioarteko konspirazio bati» egotzi zion. Bere bertsioaren arabera, inoiz ez zuen izan Bosnia Jugoslaviatik banatzearen aldeko jarrera, eta leporatzen dizkioten musulmanen sarraskiak gerrate zibil baten erdian jorraturiko «defentsa legitimoa» izan zela errepikatu zuen.

«Kaosa ekidin nahi genuen, ordena ezarri; baina kaosa guregana etorri zenean, ezinezkoa izan zen kontrolpean mantentzea», esan zuen.

Genozidioa eta gerra-krimenak

1992tik 1995era Bosnia-Herzegovinako gerran jazotako genozidio eta gerra krimenengatik hamaika akusaziori egin beharko die aurre Karadzicek. Leporatzen dizkioten genozidioak honakoak dira: 1995ean Srebrenican 7.000 gizon eta gazte musulmanen sarraskia; eta Sarajevoren setioa, gerrak iraun bitartean 10.000 hildako eragin zituena.

Bere burua defenditzeko asmoarekin, Karadzicek adierazi zuen ICTYko fiskal ohi Carla del Pontek onartu zuela, 1995ean, Bosnia-Herzegovinako gerra amaitzeko sinatu zen Daytongo Hitzarmenean, AEBek immunitatea agindu ziotela.