Donostiako administrazioarekiko auzietako bigarren auzitegiaren epaian agertzen denez, Kutxak bere Administrazio Kontseiluko idazkariaren ordainsariak EAJ alderdiaren kontuetan sartzen zituen. Gipuzkoako ezker abertzaleak «eskandaluzko» jo zuen hori eta, bere iritziz, horrek Kutxak EAJ finantzatzen duela erakusten du.

Epaiaren arabera, Donostiako Udaleko funtzionario batek, bere lan ordutegian, Kutxako Administrazio Kontseiluko bileretan parte hartzen zuen. Baina funtzionario horrek, EAJko kide izanik, Kutxatik ordainsaririk jasotzen ez zuela adierazteko, dirua zuzenki EAJren kontuetan sartzen zela aitortu zuen auzitegian.

«Milaka euro sartzen ditu Kutxak EAJren kontu batean funtzionario horrek egiten duen lanagatik», gaitzetsi zuen ezker abertzaleak, udal funtzionarioak aldi berean bere laneko soldata ere jasotzen duela gogoraraziz, erabateko arduraldiaren osagarria jaso arren. Ezker abertzaleak EAJk dituen beste ordezkarien ordainsariak ere alderdiaren kontuetan sartzen direla uste du eta, horrenbestez, Kutxak EAJ finantzatzen duela salatu du. Gainera, epaile batzuk horrelako jarduerak onartzen dituztela salatu zuen.

Ezker abertzalearen arabera, EAJk Kutxa bere interesen alde erabiltzen du eta «oso larritzat» jo zuen gertatutakoa, auzitegi batek funtzionario bati legea hausteko baimena ematen diolako, bere lanaz gain, beste lan bat egiten uzten diolako. Justiziak interes politiko baten alde jokatzen duela gaineratu zuen. Izan ere, ezker abertzaleak gogorarazi zuenez, auzitegiak funtzionarioak bateraezintasun aitorpenik ez duela egin behar ebatzi zuen.

Goi kargudunen soldatak gora

Horrez gain, Goi Zuzendaritzako kideen soldatak igo dituztela gogorarazi zuen. Gipuzkoako ezker abertzaleak jakin duenez, goi zuzendariek batez beste %7 igo zituzten beren soldatak 2009an, Kutxaren etekinak %30 murriztu ziren urtean, alegia.

Ezker abertzaleak egindako kalkuluen arabera, kontseilari bakoitzak iaz batez beste 178.823,53 euro jaso zuen, aurreko urtean baino 12.123 euro gehiago. Baina kopuru horretan langileen ordezkarien diru sarrerak sartzen dira. Beraz, goi kargudunen soldatak bakarrik kontuan hartuta, igoerak %9koak izan daitezkeela uste du. Kutxak banakako soldatak publiko ez egiteagatik, ezker abertzaleak zerbait ezkutatu nahian dabilela uste du.