Pariseko finalera egin nahi duen bidean, Biarritzek azkeneko geldialdia izango du gaur Anoetan, 16.15etik aitzinera Munsterren aurka Heineken kopako finalerdikoa jokatzeko. Zuri-gorrien eta euskal errugbi zaleen nahia eta ametsa, gaurkoa azkeneko geldialdia izatea da, gero aurrera jarraitzeko, horrek finalean izango dela esan nahiko bailuke.

Irlandarrak dira faborito gaurko partidarako, baina kanporaketa norgehiagoka batean erabakitzen denean edozer gerta daiteke, eta are gehiago, Biarritzek bezala etxean jokatuz gero. Beraz, askok uste baino norgehiagoka estuagoa eta irekiagoa iragartzen da.

Ez da euskaldunek eta irlandarrek elkarren aurka jokatzen duten lehen aldia izango, Heineken Kopako lehian jadanik hiru aldiz neurtu baitituzte indarrak, eta emaitzak beti oso orekatuak izan dira, nahiz eta hiru horietatik bakarra bereganatu duen talde lapurtarrak.

Lehen neurketa 2001ean izan zen, eta orduan final-laurdenetako partida izan zen Irlandan. Munsterrek 38-29 irabazi zuen. Bigarren aldiz, 2005eko apirilaren 5ean neurtu ziren Anoetan. Hura izan zen Biarritzek Donostian jokatu zuen lehen partida eta garaipena erdietsi zuen 19-10, finalerdietarako txartela eskuratuz. Azkenekoz, 2006ko maiatzaren 20an neurtu ziren Cardiffen, eta orduan finala zuten jokoan. Irlandarrek 23-19 irabazi zuten. Beraz, aurrekariak ikusita eta Anoetan jokatu zuten azkeneko partida kontuan hartuta, itxaropenerako tarteak zabalik daude.

Biarritzek, gainera, asko du jokoan. Izan ere, liga tamalgarri bat egin ostean, datorren urtean Heineken Kopa jokatzeko txartelik gabe geratu dira, eta hori jokatzeko duten aukera bakarra lehiaketa hau irabaztea da. Horregatik, denboraldia balekotzat jotzeko hau irabaztea besterik ez zaie geratzen, gainerakoan zuri-gorrien sasoia oso iluna izango baita.

Jokalariei dagokienez, berri gazi-gozoak ditu Biarritzek, izan ere Traille ez da jokatzeko moduan izango, eta hori sekulako hutsunea izango da, azkenaldian taldeko jokalaririk onenetakoa izan baita. Beste aldean, ordea, Imanol Harinordoki jokatzeko moduan dago, eta garaztarra hasieratik arituko da. Imanolek sudurra apurtuta dauka, baina babes berezi batekin jokatu ahal izango du eta hamabostekoan izango da.

Hamabostekoa, honako hau izango da seguruenik: Ngwenya, Mignardi, Erinle, Gobelet, Hunt, Yachvili, Lauret, Harinordoki, Lund, Hall, Thion, Johnstone, August eta Coetzee. Aulkian, berriz, Terrain, Barcella, Hugues, Carizza, Faure, Courrent, Peyrelongue eta Bidabe geratuko dira. Munsterrek zelairatuko duen taldea, hau izango da: Warwick, Howlett, Earls, J. de Villiers, Dowling, O'Gara, O'Leary, D. Wallace, Coughlan, Quinlan, M. O'Driscoll, O'Callaghan eta Hayes. Varley, Brugnaut, Buckley, Williams, Ronan, Stringer, Mafi eta Deasy aulkian geratuko dira. Epailea, berriz, Dave Pearson jauna izango da.