Liga irabazteko Bartzelona eta Real Madrilek duten borrokan, gainerako talde guztiek gonbidatu soilak dirudite azkenaldian, baina Osasunak bere protagonismoa aldarrikatu eta mailari eutsiko diola behin betiko ziurtatzeko aukera izugarri polita dauka gaur arratsaldean Santiago Bernabeun. Helburuak arras zaila dirudi, are gehiago Camachok Pandiani etxean utzi eta gero, baina denboraldi nahiko gris baten ostean, gaur Real Madrili irabazita poz bikoitza emango lieke talde gorritxoak bere jarraitzaileei.

Dena dela, Madrilen beharrak, entrenatzaile gorritxoa iraganean zurien artekoa izateak, Sadarretik kanpo jokatutako azken sei partidak galtzeak eta Pandiani Iruñean geratzeak, Osasunak aldez aurretik garaipenari muzin egingo dion sentsazioa zabaldu dute azken egunetan. Aurrelari uruguaitarraren kasuan, Camachok argitu zuen tendoian arazotxo bat duela eta gaur Bernabeun jokatuz gero, ezingo lukeela asteazkenean Deportivoren aurka Sadarren jokatu beharreko partidan aritu.

Nou Campen antzera

Gauzak horrela, oso posible da Osasunak Bartzelonaren aurka erabilitako joko sistemaren oso antzekoa, aurrelari bakarrarekin, erabiltzea gaur Real Madrilen aurka. Vadocz hungariarra izango litzateke berrikuntza nagusia, bi euskarri -bata Ruper izango da ziurrenik, eta bestea, Nekounam eta Puñalen arteko zalantzak daude- eta aurrelari bakarraren -Aranda edota Massoud- tartean kokatuta.

Atzealdeko lerroan, lehen itzulian Real Madrilen aurka horren ondo aritu zen Roversiok berriz ere jokatuko luke Sergioren alboan, Athleticen aurkako derbian taldera itzuli eta maila ona erakutsi ostean.

Real Madrilen hamaikakoaren inguruan ere zalantza dexente daude, Guti eta Arbeloa azken orduan deialdian sartu badira ere, ez baitago batere argi hasieratik jokatuko ote duten. Erdilaria ez omen dago 90 minutu jokatzeko moduan eta atzelaria aste osoa normaltasunez entrenatu ezinda egon da. Garay eta Granero izango lirateke bere ordez sartuko liratekeenak. Van der Vaartek denboraldiari agur esan ostean, Kaka osatu berriak izango du aurrelariekin, Higuainekin eta Cristiano Ronaldorekin, jokoa sortzeko ardura.

Etxaide, min hartuta

Atzoko entrenamenduko sustoa Jon Etxaidek eman zuen, eskuin orkatilean zaintiratu bat egin ostean gaur baja izango baita.