Hilabete honetan, «Mar de Fueguitos» saioaren hamar urteko bidea ospatzeko asmoz, «La década luminosa» saioa eskainiko dute astelehenetik ostiralera 13.00etatik 14.00etara; eta ekainaren 19an, 21.30ean, Bilboko Kafe Antzokian festa bat antolatu dute Gualitxo eta Mallacán taldeen emanaldiekin. Sarrerak 10 euroan salduko dira eta irabazitako dirua Tas-Tas irrati librearentzako izango da osorik. Gainera, aurten Tas-Tas Irratiak 18 urte bete ditu; bi ospakizun ekitaldi berean, beraz.

Saio berezian, hamar urte betetzen dituzten beste elkarte batzuk elkarrizketatuko dituzte; hala nola Red Ciudadana para la Abolición de la Deuda Externa. Horrez gain, Vía Campesina elkartearekin eta Juntas de Buen Gobierno zapatistekin ere hizketaldiak izango dira ekainean. Eta oroimenekin amaitzeko, hamar urte hauetan egindako erreportaje eta elkarrizketa batzuen aukeraketa eta emanaldia egingo dute «La década luminosa» saioan.

«Mar de Fueguitos»-ek gizarte mugimenduak ditu hizketa gai eta saioa, Gorka Andraka kazetariaren agindupean egiten da osoki. 2005. urte hartan, saioaren zuzendaria kanpoan utzi ondoren, Radio Euskadik gune hori mantentzea erabaki zuen ildo editorial kritikoa aldatuz, eta, ondorioz, «gunea erabat hutsalduz», diote Tas-Tas Irratikoek. Milaka entzuleren kexen ondorioz, «Radio Euskadiren intentzio horien porrota» etorri zen, baina, hala ere, kexa horiek egon arren, saioak Radio Euskadin jarraitu zuen. Baina, «pertsona horiei esker», «Mar de Fueguitos»-ek Tas-Tas Irratian jarraitu zuen bere ibilbidea.