Estatistikak, bitxikeriak, datuak, datuak eta datu gehiago; dena, egitate hotzen jantziaz mozorroturiko sorginkeria trazako konjuruak neurri handi batean. Osteguneko partidan Caja Laboral Baskoniak egindako balentriak ez dio eman oraindik faborito izaerarik; izan ere, Bartzelonak, ostegunekoa barne, sei partida galdu ditu denboraldi osoan, eta jokaturiko lehia denetan inposatu da. Alabaina, ACB Ligako finalen historiak gasteiztarren alde hitz egiten du: bi alditan izan ezik, aurreneko partidan garaile izandakoak eraman du titulua.

Eskuarki, etxekoek irabazi izan dute finaleko lehenengo partida, baina -ostegunekoaz gain- zortzitan bisitariak izan dira garaile -aurreko bi urteetan ere bai- eta zazpitan sorpresa eman dutenak atera dira garaile. Tartean dira Baskoniak irabazi dituen biak -Malagan eta Bartzelonan garaile atera ostean-, arabarrek TDK Manresaren aurka galdu zutena -baskonisten historiako ligako aurreneko finala-, Herrerosen hiruko malapartatu harekin amaitu zen hura, eta baita iazkoa -Basilek sartutako hiruko haren bidez erabaki zena- ere.

Aldiz, etxekoek behin bakarrik lortu dute ligako titulua: Bartzelonak Malagako Unicajari 1994/95 denboraldian irabazi zion hura. Andaluziarrek aurreneko partida eta hirugarrena eraman zituzten, baita laugarrenean liga eskuratzeko abagune ezinhobea ukan ere, baina Michael Ansley-ren azken hirukoa ez zen sartu eta, hala, Aito garcia Renesesek zuzenduriko Bartzelona hark kanporaketa berdindu eta Palau Blaugranan eman zion errematea.

Fedea eta berdin jarraitzea

Finaleko aurreneko partida jokatu aurreko egunean Dusko Ivanovic eta bere jokalariek Caja Laboral Baskoniak Palau Blaugranan irabaz zezakeela «sinisten» zutela adierazi zuten behin eta berriz. Baita azkenean halaxe egin ere. Marcelinho Huertas antolatzaile brasildarrak partidaren ostean taldeak bere buruagan izandako «konfiantza eta fedea» nabarmendu zituen.

«Ez gara Bartzelonara oporretan etorri. Irabaz genezakeela sinetsita etorri gara hona, finalera lana beltz egin eta asko sufrituta, merezita, iritsi garelako. Bartzelonak faborito izaten jarraitzen du, ez du alferrik jokatu duen dena irabazi, baina guk lanak eman geniezazkiokeela bagenekien, baita noiznahi egurra eman diezagukela ere, baina gu hona irabaztera etorri gara».

Ostegunean Caja Laboral Baskoniak sekulako lana burutu zuen defentsan. Bartzelonak ez zuen jaurtiketa erosorik aurkitu eta, hala, 10 puntu baino ezin izan zituen sartu azken laurdenean, orotara 58 puntu lortzeko; hau da, denboraldiko kopururik txikiena. Badu meriturik, talde kataluniarrak batez beste 80,4 puntu sartzen dituela ikusita.

Sao Pauloko jokalariaren aburuz, gaur arratsaldeko partidan osteguneko jarrerari eutsi behar diote, aurkariak gogotsu arituko direla jakin arren. «Bigarren dema lehenengoa baino zailagoa izango dela uste dut. Normala den moduan, amorruz aterako da Bartzelona, baina guk berdin jarraitu behar dugu, eta lehen baino are konfiantza handiagoz jokatu beharra daukagu».

«Beraz, deseroso sentiarazi behar ditugu. Navarro edo Mickeal bezalako jokalariek ez dute asko behar beren kalitatea inposatzeko. Bada, une oro gainean gaudela ikusi behar dute. Asko erraztuko lizkiguke gauzak bigarren partida ere irabaziko bagenu, izan ere, etxean eroso eta indartsu sentitzen gara, eta nahiz eta Bartzelonak liga erregularrean Gasteizen ere irabazi zigun. Oso zaila litzateke bosgarren partida bat hemen bertan irabaztea», gaineratu zuen Marcelinho Huertasek.