Estatu sionistak Gazara zihoazen ontzien kontrako erasoagatik barkamena eskatu ezean, Israelekin harremanak apurtuko dituela jakinarazi zuen atzo Turkiak. Horrez gain, Israelgo hegaldi militarrek Ankarako aire eremua itxita izango dutela iragarri zuen.

Ankarako diplomaziaburu Ahmet Davutogluk eman zuen jarrera erabaki horren berri. Joan den astean bi herrialdeek bilera sekretua izan bazuten ere, harremana konpontzeko asmoak ustel atera ziren.

Orain arte, turkiarrek ez dute harreman diplomatikoak apur zitzaketenik aipatu ere, nahiz eta orain arte eredugarriak ziren harremanak unerik txarrenean egon. Maiatzaren 31n Israelek Gazara giza laguntza zeramaten ontzien aurka eraso egin eta Turkiako bederatzi herritar hil izanak okertu ditu harreman horiek.

Turkiak Israelen zuen enbaxadoreari etxera itzultzeko eskatu zion eta Estatu sionistarekin egin behar zituen ekitaldi militarrak bertan behera utzi zituen.

Kirgizistanerako hegazkinera igo aurretik kazetariei egindako adierazpenetan, Davutogluk Israeli barkamena eskatzeko eta nazioarteko ikerketa batzordeko ondorioak onartzeko exijitu zion. «Bestela, harremanak apurtuko ditugu», ohartarazi zuen.

«Israelek ez dio inoiz barkamenik eskatuko Ankarari», erantzun zuen atzo Israelgo lehen ministro Benjamin Netanyahuren bulegoko eledun batek. Ministroak berak ere Israelek ez zuela barkamenik eskatuko esan zuen ostiralean.

Aldez aurretik egindako adierazpenetan ez bezala, Davutogluk ez zuen txartzat jo Israelek bere kabuz antolatu duen barne mailako ikerketa batzordea. «Batzorde horrek erasoa legez kanpokoa izan zela adostuz gero, nahikoa izango litzateke», nabarmendu zuen Turkiako Atzerri ministroak, kaltetuek kalte ordainak jaso behar dituztela nabarmenduta.

Horrekin batera, gertatutakoa aztertzeko nazioarteko ikerketa batzorde bat antolatzea premiazkoa dela adierazi zuen berriro Turkiak. Bide batez, Davutogluk Israleen hegaldi militarrek Turkiako aire eremua itxita izango dutela esan zuen.

«Erabaki honek ez die soilik bizpahiru hegazkini eragingo», nabarmendu zuen Davutogluk, aurrera begira hegaldi zibilei dagokienez neurri bera ezartzeko aukera zegoela gaineratuta.

Auzi honen inguruan honela mintzatu zen Israelen eta Turkiaren arteko harremanetan aditu den Ofra Bengio israeldarra: «Lehia honetan Israelek galtzeko gehiago dauka. Turkia NATOko kidea da eta harreman estuak ditu herrialde islamiarrekin. Gurekin harremanik izan gabe arazorik gabe bizi daitezke, baina gu eskualdean isolaturik dagoen herrialde txiki bat gara».

«Kontua da oso ideologizaturik dauden bi gobernuren aurrean gaudela eta konponbide bat aurkitzea oso zaila dela. Turkiarrek gehiegizko eskaerak aurkeztu dituzte eta israeldarrek malgutasun handiagoz jokatu behar zuten», gaineratu zuen Tel Aviveko Unibertsitateko irakasle Bengiok.

«Ezin da ukatu ontzien afera kolpe latza izan dela bi herrialdeen arteko harremanentzat», nabarmendu zuen Ankarako Usak gogoeta zentroko Osman Bahadir Dinçerrek.

Halere, Dinçerren ustez, ez Turkiak ez Israelek ez dute harremana benetan apurtzeko asmorik. «Batak bestea behar du Ekialde Hurbileko xake joko diplomatikoan», bota zuen.