Saiakerak amaitu dira. Eguerdi ostean hasiko da Turkiako Mundu Txapelketa, eta nahiz eta taldeek oraindik ez duten beren jokorik onena egingo, prestaketek benetan ezer balio izan duten ikusteko aukera izango da.

Horrez gain, lehenengo ezustekoak ere ikusiko dira ziurrenik. Esaterako, estatu frantseseko selekzioak Espainiari egundoko belarrondokoa eman diezaioke. Estatu espainoletik kanpo jokatu zuen partida bakarrean Scariolorenek asko sufritu zuten, eta epaileek beren alde hain nabarmen egitera ohituta, epaile «neutralekin» munduko egungo txapeldunek uste baino izerdi handiagoa atera beharko dute bleuen aurka. Frantziak Parker falta du, baina Boris Diaw, Nicolas Batum eta Nando De Colo-ren eskutik, zeinahiri lanak emateko gai da. Bestetik, Pau Gasolen eta Calderonen falta suma lezakete espainiarrek.

AEBen erritmoa

Urrezko domina lortzeko beste faborito nagusia, Ameriketako Estatu Batuetako selekzioa, Kroaziaren aurka hasiko da. Badirudi Mike Kryzewski-ren mutilek, aurreneko partidan zalantza batzuk erakutsi arren, martxa hartu dutela, eta defentsa, kontraerasoa eta Kevin Durant-en eskutik maila itzela eman dute azken neurketetan, Greziaren aurka batik bat. Kroaziak Ante Tomic, Roko Leni Ukic edo Zoran Planinic-en talentua beharko du amerikarrei aurre egiteko, baina sorpresa itzela litzateke irabaziko balute.

Ikusi egin behar, bestalde, Serbiak eta Greziak nola ekiten dioten Krstik eta Teodosic eta Fotsis eta Schortsianitis-ik gabe. Balkandarrek Angola arriskutsuaren aurka egingo dute debuta, eta greziarrek Txinaren aurka. Yao Ming beraiekin balute asiarrek...