Estatu frantseseko presidente Nicolas Sarkozy-k pentsio sistema erreformatzeko aurkeztu duen proiektuan hainbat aldaketa egiteko prest dagoela adierazi zuen atzo, baina erretreta hartzeko adina bi urtez, 60tik 62ra, atzeratzeko proposamena bere horretan mantenduko duela esan zuen.

Irtenbide «zentzuzkoena» hori delako, erretreta atzeratuko duela berretsi zuen, beraz, Sarkozyk, hain justu, neurri horren aurka milaka eta milaka herritar kalera atera zituen greba orokorraren hurrengo egunean.

Nabarmendu zuenez, neurri horri eutsiko dio beste batzuk baztertu dituelako, hala nola pentsioen zenbatekoa murriztea edo presio fiskala masiboki handitzea. Izan ere, presio fiskala handituz gero, horrek erosteko ahalmena zigortuko lukeela esan zuen, eta ekonomia hazkundea oztopatuko lukeela eta deslokalizazioak sustatuko lituzkeela.

Gobernu taldeak aurkeztu duen proposamenak hainbat kasutan erretreta 60 urteetan mantentzea aurreikusten du, besteak beste, %20ko ezintasunak dutenen kasuan. Atzo adierazi zuenez, ordea, kasu horiek zabal litezke, esaterako, nekazarien kasuan eta %10eko ezintasuna dutenengana ere.

Bestalde, erretreta-sistemaren erreforma Estatu frantseseko erreformarik garrantzitsuenetarikoa izango dela adierazi zuen, eta datozen belaunaldiei sistema bermatzea beharrezkoa dela: «Funtsezko erreforma da».

Greba orokorraren deialdiak mobilizatu zituen milaka eta milaka herritarren jarrera dela-eta, proposamenak kezka eta protestak sortzea «normala» dela esan zuen, eta herritarren kezkak kontuan hartzen dituela adierazi. Hala, greba deitzerakoan sindikatuak beren «zeregina» betetzen ari direla onartu zuen arren, protestek zerbitzu publikoetan izan ditzaketen ondorioak direla-eta Gobernuak adi egon behar duela esan zuen.

Azkenik, erreforma honekin presidente gisa erantzukizunez jokatzen ari dela nabarmendu zuen, esanez «estatuburu baten betebeharra» ez dela zailtasunak baztertzea edo konponketa ondorengoei uztea.