«Ez nuen leziorik eman nahi. Bullying-a gaztetxoek pairatzen eta egiten dute eta beraiek ikustea nahi nuen, beraientzako film bat egin eta ez drama bat, ondo pasatu eta, bide batez, horri buruz pentsa dezaten», azaldu zuen atzo Arantza Ibarrak. Bera da «Zigortzaileak» pelikularen zuzendaria Alfonso Arandiarekin batera, eta abentura eta fantasiaz beteta jorratu du ikasgeletako tratu txarren arazoa.

«Gidoia idaztean neskato baten buruan sartu nahi nuen, bere fantasian, superheroiak sortuz ikastetxetako menderatzaileei zigorra emateko», esan zuen Ibarrak. Hamabi urteko ikasle batek kontatzen du istorioa. Leire (Amaia Aberasturi) kokoteraino dago bere lagunek jasaten dituzten burla eta irainekin. Sandra (Estibaliz Sarasola) eta Leo (Andoni Delavigne-Robles) ikaskideekin batera erasotzaileei merezitako zigorra emateko Zigortzaileak superheroi hirukotea sortuko dute, baina gelakide gaiztoenak, Anjelek (Martin Gandiaga), deskubritu egingo ditu.

Pelikulako pertsonaia nagusiak gaztetxoak dira, aurretik zineman ia esperientziarik gabeak. Aipatutakoez gain, Nikola Zalduegi, Pello Madariaga, Asier Vegas eta Izaro Baza aritu dira ikasle paperetan, beste zenbait aktore ezagunekin batera. Horien artean, Loli Astoreka, Juan Cruz Gurrutxaga, Anne Igartiburu, Carlos Sobera, Gurutze Beitia, Maite Bastos eta, gainerakoak bezala, euskaraz entzungo dugun Rafael Amargo dantzaria.

Bullying-a, transformatuta

Gaur egun komunikabideetan espazio gutxiago eskaintzen bazaio ere, ikasgeletako tratu txarrak lehen bazirela, orain ere badirela eta gero ere izango direla nabarmendu zuen Ibarrak. «Orain transformatu egin da, komunikabideetara, Internetera... Gurasoek askotan umeen arteko liskar moduan baino ez dituzte hartzen, baina arazoa hor dago», esan zuen. «Emakume bat hiltzen denean hitz egiten dugu tratu txarrei buruz eta haur batek bere buruaz beste egiten duenean, bullying-ari buruz», gaineratu zuen Beitiak. Pelikula honetan mezu bat bidali nahi izan du Ibarrak: «Ez dute isolatu behar. Denen artean elkartu eta talde bat osatuz, hobeto egingo diote aurre».

Nafarroan dagoeneko estreinatu da «Zigortzaileak» eta, bihartik aurrera, Hego Euskal Herriko gainerako herrialdetako aretoetan izango da. Ipar Euskal Herrian, oraingoz, emanaldi solteak egingo dituzte eta pelikularen egileen esanetan, ez dute telesaila egitea alboratzen.