Europako Finantza Egonkortasunerako Funtsak (EFSF) «arrakastaz» kokatu zituen atzo bost urterako epemuga duten bere lehen bonuak, 5.000 milioi euroko balioa dutenak. Irlandaren erreskatea finantzatzeko erabiliko dute aipaturiko kopurua. EFSF-k ohar batean azaldu zuenez, 44.500 milioi eurorainokoa izan zen inbertitzaileen eskaera, eskaintzakoa halako bederatzi adierazten duen zenbatekoa, alegia. Jaulkipenak interes handia sortu zuen beraz, besteak beste, EFSF-k kostuaren %2,89 bere egin duelako. Erakundearen esanetan, Asiaren eskaera handia izan da, eta Japoniak bonu guztien %20 eskuratu ditu.