2008ko bozetan egin zuen bezala, oraingoan ere Anai Artea elkarteak hautagai guztiak interpelatu ditu presoen eskubideen inguruan. Adierazpenetik harago, gainera, engaiamendu zuzena eskatu die gutunen bidez.

Hala, �Kontseilu Nagusiko ordezkaritza batek Pariseko Gobernuari eskakizun zehatzak aurkeztearen alde bozkatzeko� konpromisoa eskatzen die.

Hori ezinezkoa balitz, berriz, �Kontseiluko ordezkaritza bat -kontseilarien gehiengoa ordezkatuko ez balu ere- bultzatzera edo babestera� engaiatzeko eskaera egin die, beti ere helburu berberekin, hots, Gobernuari eskakizunok aurkeztea.

Hiru eskakizun

Hiru dira �hein berean inplikatuak diren Frantzia eta Espainiari� egin beharko lizkieketen eskabideak.

Lehena, �euskal preso politiko guztiak beren familietatik hurbilen dauden presondegietara hurbiltzea�. Bigarrenik, �biziki eri diren eta, preso arruntei ezartzen zaizkien baldintza beretan, kondena betea duten presoak askatzea�. Azkenik, �ETA erakundea, bere baitarik eta nazioartearen kontrolpean, existitzeari uzten dion unetik, euskal preso politiko guztientzat amnistia� aldarrikatzea.

Eskakizuna lagunduz, egungo egoeraz zenbait azalpen ematen dizkie kantonamenduetako hautagaiei preso eta errefuxiatuen eskubideen alde aspaldiko urteetan lanean diharduen elkarteak.

Horrela, Parisek zein Madrilek �euren prozedura-kodeak� bai eta Europak egindako �presondegi-gomendioak ere, gisa berean mespretxatzen� segitzen dutela gogorarazten die, �ETAk nazioarteko kontrolpean su-etena aldarrikatu badu ere, errepresio franko-espainiarrak bere horretan segitzen� duela nabarmendu aitzin.

Joan den urteetako eta azken hilabeteetako zenbait adibideren (GAL, euroaginduak...) errepasoa eginda, �egun, Espainiak biolentzia politikoaren desagertzea� lortzeko �eskubide demokratikoak errespetatzea eta alderdiak legeztatzea� ezinbestekotzat jotzen du Anai Arteak.

Presoena, gako nagusia

Presoen gaiari helduz, �gatazka humanizatzeko haien familietatik hurbiltzearen� alde egindako lan eta ekimenak azaldu eta �behin betiko aterabideari begira, presoen gaia gako nagusietakoa� izanen dela gaineratzen du bere azalpenean.

Amaitzeko, hautetsiak �lurralde baten ordezkariak izateaz gain, bertako biztanleenak ere� badirela gogorarazi ostean, haien arazoez arduratzeko duten erantzukizunari heltzera dei egiten du.