Igor Esnaola legorretarra, asteartean bere anaiarekin batera atxilotu zutena, aske utzi zuen atzo arratsaldean Guardia Zibilak Madrilen. Arratsaldeko seietan utzi zuten aske Madrileko Guzman el Bueno kaleko komisarian, eta bere kabuz moldatu behar izan zuen gurasoen etxera deitzeko. Madrilen zen Aiert Larrarte abokatuak jaso eta Euskal Herrirako bidea egin zuten. «Gogorrak» izan dira Igorrentzat orduok, mehatxu eta galdeketa etengabeak egin dizkiote; guardia zibilek komisarian atxilotu gehiago zeudela sinetsarazi zioten.

Bestalde, baliteke Aitor Esnaola, anaia zaharrena, gaur eramatea Auzitegi Nazionaleko Fernando Grande-Marlaskaren aurrera. Epailearen agindupean, hainbat miaketa egin zituen atzo Guardia Zibilak Tolosaldean. Hedabide espainolek goizean iragarria bazuten ere, Alfredo Perez Rubalcaba barne ministroak baieztatu egin zuen Andoni Goikoetxea bizilagunaren bila joanak zirela. Goizaldeko hiruretan Leaburu-Txaraman haren neska lagunaren gurasoen etxea miatu zuten agenteek eta bostak inguruan Goikoetxearen baserria Gaztelun.

Lander Etxeberria, hirugarren atxilotuari, bestalde, Aitor eta Goikoetxearen eta ETAren arteko lotura lanak egitea leporatu zion ministroak. Etxeberria Beran atxilotu zuten ostegunean eta Villabonako bere etxera eraman zuten miaketa egitera, goizaldeko ordu batak pasatxo zirela, bertaratu ziren herritarren babes eta animo oihuen artean.

Billabonatarrak «une honetan jasan dezakeen tratuarekin kezka» agertu zuten atzo Kontseiluko lankideek. Ohar batean ziotenez, «ongi aski ezagutzen du euskalgintzak eta bertan lan egiten duen jende andanak Guardia Zibilaren esku inkomunikatua egotea zer den».

Azken egunotan Legorretan bezala, Villabonan eta Gaztelun ere polizia operazioak salatzeko elkarretaratzeak izan ziren atzo iluntzean. Legorretan, sentimendu gazi-gozoarekin, Aitorren askatasuna eskatuz 200 lagunek manifestazioa egin zuten. Villabonan beste 250 lagun bildu ziren; Etxeberria inkomunikatuta eduki artean egunero 20.00etan elkartuko dira.