GARA > Idatzia > Kultura

Joxemari Carrere Ipuin kontalaria

Isiltasuna

Segur aski Guadalajaran antolatzen den Ipuin Maratoia izango da Europako ipuin jaialdirik garrantzitsuenetakoa. Ekain aldean eta hiru egunez, Mantxako hiriburuak ehunka pertsonaren parte hartzea izan ohi du duela hogei urtetik hona. Parte hartzea diot, jendeak berak kontatzen baititu ipuinak, nahi duenak. Ostiralean hasi eta igande eguerdira arte, gau eta egun, etenik gabe, ipuinak kontatzeari ekiten diote. Herri festa galanta.

Aurten, ordea, nazioarteko padel txapelketa antolatu dute justu Jaialdiaren egoitza den Infantadoko jauregiaren aurre aurrean. Mila pertsona hartzeko behin- behineko padel jolaslekua. Urtero gai bat hartzen dute maratoiaren lematzat; aurtengoa isiltasuna da. Hitzen, berriketaren munduan, isiltasunaren garrantzia. Baina, oraingoan ere, ezin isilik egon.

ßehin batean, goizaldeko zazpietan-edo, lagun kontalari batek animatu ninduen ipuin bat euskaraz kontatzera. Jaialdi batean geunden eta publikoan hogei bat lagun baino ez ziren izango, gehienak erdi lo edo gaupasaren moteltasunak jota. Esan zidan, agian, euskaraz kontatuta jendea suspertuko zela, halako hizkuntza bitxia entzunez, han. Nik, gehienak bezala, ipuinak kontatzeko indar gutxirekin nengoela erantzun nion. Bera temati jarri, eta orduan proposatu nion kontatuko nuela baldin eta berak itzultzen bazuen nire ipuina. Eta primeran iruditu zitzaion. Igo gara agertokira. Arrazoi zuen lagunak, euskarazko lehenengo hitzak entzutearekin batera, erdi lo zegoen jendea suspertzen hasi zen, ezusteak jota; baina are gehiago suspertu zen laguna itzultzen hasi zenean, euskara zipitzik ez baitzekien. Guadalajarako Ipuin Maratoia zen.
Imprimatu 
Gehitu artikuloa: Delicious Zabaldu
Igo