Bergarako jaiak bide erdira iritsi dira jada. Ostiralean txupinazoak eztanda egin eta Bitorianatxok jaitsiera egin zuenetik, musikak, algarak eta jai giroak ez du etenik izan herrian. Gorputzak ere sumatzen hasiak izango dira festaren gorabeherak, baina hala eta guztiz ere, aurrera egiteko gogoa da nagusi, asko falta da, gainera, oraindik helmugara iristeko.

Herritarrak ez ezik, kanpoko herrietatik etorritakoak ere izan dira egunotan Bergaran. Debagoienekoak beharbada gehientsuenak, inguruko herrietatik etorritakoak, alegia. Eskualdean unibertsitate ugari dagoela-eta, fakultate ezberdinetako ikasle asko izaten omen da Bergarako festetan. Ez dira, beraz, gutxi izango egun hauetan herri honetara bisitaren bat egitera etorriko direnak.

Herriko ereserkiak entzun ahal izango dira gaur eguerdian Udal Musika Bandak Espoloian eskainiko duen kontzertu oparoan. Askotariko piezak eskainiko dituzte, pasodoblea, obertura, ezpata-dantza eta musikala, esate baterako.

Arratsaldean, apar festa egingo dute Munibe plazan. Aldatzeko arropak eramatea edo apar dantzaren ostean etxetik pasatzea komenigarria izango da, dutxa apartsua plazan izango da-eta. Uraren eguna dirudi gaurkoak, goizean zehar eta eguerdi partera arte voley water-a eta ur puxikak botatzen aritzeko aukera izango baita San Martinen. Banakako Xake Azkarreko Txapelketa eta Euskal Herriko 34. Dantza Askatuko Txapelketa ospatuko dira gaur.

Koadrilen eguna badator!

Astea festan murgilduta hasiko dute bihar Bergaran, izan ere, Mendekosteetako egun handietako bat izango da, Koadrilen Eguna eta San Antonio eguna izango baita. Goizean herriko Tabernen Arteko Herri Kirol Txapelketa egingo dute zezen plazan, eta Xapre eta Zarra trikitilariak eta Incansables txarangak animatuko dituzte bazterrak.

Blusak edo kamisetak jantzita irteteko eguna izango da bihar. Lagunen konpainia onean, herri bazkaria egingo dute plazan, Incansables txaranga nekaezinaren doinuek girotuta. Txartelak salgai daude Kultur Etxean, Depor, Ariznoa eta Frontoiko tabernetan; 15 euroren trukean eros daitezke. Euria eginez gero, Labegaraietako kiroldegian egingo da bazkaria.

Sabela bete ostean, koadrilen arteko jolasak eta karaokea izango dira DJ Angierekin. Arratsaldean, bi euroren truke, erre- kortadore eskola ibiltariak zezen-plazan zezentxoekin egingo duen erakustaldia ikusteko aukera izango da.

Gaztetxoek eta barrakazaleek egun aproposa izango dute bertaratzeko, egun osoan barraketako atrakzioak ohi baino merkeago egongo dira-eta.

Bestalde, udal pilotalekuan Bergarako Hiria pilota partidetako finalak jokatuko dituzte, beraz, norgehiagoka ziurtatuta egongo da bertan.

Arratsalde eta gau partean erromeria egongo da plazan, Imuntzo eta Beloki taldearen eskutik. Camp dantzaldia ere izango da Espaloian Fabulosa taldearekin .

Txosnei dagokienez, erromeria izango da 20.00etan, Joxpa taldearekin. Ilundu ostean, kontzertua emango dute EH Sukarra talde eibartarrak eta Dolce Tanganak.

Ordu batzuk gelditzen dira, beraz, biharko eguna iritsi arte. Bien bitartean gaurkoaz gozatu eta izan litezkeen ajeak ahalik eta ondoen pasatzea besterik ez da gelditzen.