Hogei zibil hil ziren atzo indar armatuek tirokatuta Homs hirian, Giza Eskubideen Behatokia oposizioko taldeak adierazi zuenez. Siriako Gobernuak errepresioa bukatzeko Liga Arabiarraren plana «argi eta garbi» onartu ondoren gertatu ziren eraso hauek. Indarkeria bertan behera utzi, atxilotuak askatu, Armada hirietatik atera eta hedabideak askatasunez lan egin ahal izatea dira da plan horren baldintzak.

Baina oposizioak ez da fidatzen, errepresioak jarraitzen duelako. Hildakoez gain, indar armatuek atxiloketa gehiago egin zituztela salatu zuen. Behatokiaren arabera, ekialdean dagoen Deir Ezzoren eta beste herrietan 80 pertsona baino gehiago atxilotu zituzten.

Baina aldi berean, milaka pertsonek parte hartu zuten Bashar Al Assad presidentearen aldeko manifestazioan Tartousen. Telebista publikoaren arabera «ehunka mila pertsonek atzerriko esku hartzearen kontrako manifestazioan parte hartu zuten». Oposizioak oraindik zalantzan jartzen du Al Assaden Gobernuaren «benetako asmoa». «Pozik gaude Liga Arabiarrak egindako ahaleginekin siriarren odolaren isuria gelditzeko baina zalantzan jartzen dugu erregimenak puntu guztiak onartzea», adierazi zuten Tokiko Koordinazio Batzordeek. Protestak burutzen dituzten talde hauen ustez, puntu guztiak onartzen badira, «herritarren talde gehiagok euren jarrera politikoak adierazteko eta manifestazio baketsuetan parte hartzeko aukera izango dute».

Oposizioak elkarrizketari ez

Hala ere, orain arte oposizioak Ligaren bitartekaritzak porrot egin duela salatu du behin eta berriz azken egunotan, Damaskorekin harremanak bertan behera uzteko eskatu dio-eta. Hala adierazi zuen oposizioko hainbat talde biltzen duen Siriako Kontseilu Nazionalak (SKN).

Hain zuzen, Liga Arabiarreko burua den Nabil al-Arabik Kontseiluko ordezkariak jaso zituen atzo, Samir al-Nachar, SKNko zuzendaritzako kidearen arabera. Ligaren planak Gobernua eta oposizioaren arteko elkarrizketa aurreikusten badu ere, Nacharek uko egin zion proposamen horri. «Ez, gu ez gara elkarrizketaz mintzo. Eskatzen duguna Al Assadek boterea uztea eta erregimen larderiatsuak erregimen demokratiko bati boterea uztea da», esan zuen.

Errebolta hasi zenetik ostiralero egin dutenez, gaur ere kalean protesta egiteko deia egin dute oposizioko taldeek. Gaurko lema «Ala handia da, despota eta tiranoen aurka».