Usopop jaialdiaren bigarren edizioa larunbat honetan ospatuko da Saran eta antolatzaileek egitarau berezia prestatu dute jaialdirako: Rover bakarlari paristarra, Ruper Ordorika, Islaia Hazparneko rock taldea eta Aloe Vera DJ set izanen dira, besteren artean Lur Berri aretoan eta gaztetxean. «Festibala sortu dugunetik, Euskal Herriko talde bereziei lekua egitea da gure asmoa, musika independente eta alternatiboari bultzada bat eman nahirik aldi berean», esan zuen Patxi Dutournier Usopop elkarteko kide eta antolatzaileak.

Ipar Euskal Herriko agertokietan gutxitan ikus daitezkeen taldeez gozatzeko primerako abagunea izatea nahi dute. Bestalde, gure mugetatik kanpoko taldeak ezagutzeko aukera ere izango dute bertaratuek.

Hemengo eta kanpoko taldeen arteko harremanak bideratzea da beste helburuetako bat: «Taldeen arteko ezagutzak bultzatu nahi ditugu. Bertakoak eta kanpokoak elkar ezagutaraziz musikagileek balio komun batzuk partekatzen dituztela erakutsi nahi izan dugu», adierazi zuen Dutornierrek.

Baleapopekin lotuta

Usopop Baleapop jaialdiarekin lotuta dago, bietan garatzen dituztelako lurrarekiko eta itsasoarekiko harremanak, baita belaunaldien artekoak ere. Udako Usopop jaialdia Sarako mendi batean ospatuko dute, Lizarrieta basoan, bertako ondarea eta ingurumena baliatu nahi baitituzte beren ekintzen alde.