Sirian su-etena ezarri zenetik, igaro den astean 120 zibil baino gehiago hil dira, egunero su-eten hori apurtzen dutelako bai Siriako Armadak, bai matxinatuen armadak.

Atzo bertan, gutxienez zazpi pertsona hil ziren, Deir Ezzoren eta Yabrouden, Damasko eskualdean, oposizioko Siriako Giza Eskubideen Behatokiaren arabera. Talde horrek dioenez, Armadaren eta matxinatuen arteko borrokak ez dira gelditu, su-etenak ezarrita izan arren eta Nazio Batuen behatzaileak dagoeneko Sirian egon arren. Su-etena indarrean sartu zenean nabarmenki egin zuen behera biktimen kopuruak, baina igandean lehenengo behatzaile taldea iritsi zenetik, gora egin du, eta azken hiru egunotan 80 hildako baino gehiago izan dira.

Oposiziokoek Annanen plana egunero urratzea egozten diote erregimenari, oraindik hirietan tankeak eta soldaduak daudelako. Gobernuak, bere aldetik, «talde terrorista armatuen» erasoetan egunero jendea hiltzen ari direla salatzen du. Moustafa Ahmed Al-Cheikh Siriako Armada Librearen buruetariko batek «aliantza militar» batek esku hartzea eskatu zuen atzo. Bitartean, Parisen, Mendebaldeko eta hainbat herri arabiarretako ordezkari diplomatikoak elkartu ziren, Damaskoren kontrako presioa gogortzeko. Hillary Clinton AEBetako Estatu Saileko idazkariak Bashar Al Assad Siriako presidenteari ohartarazi zion «neurri berriak» hartuko zituela, Annan planaren «azken aukera» galtzen badu. Errusiak eta Txinak ez zuten parte hartu, gonbidatuak izan arren. Moskuren arabera, bileraren helburua ez da Siriako Gobernuaren eta oposizioaren arteko elkarrizketa bultzatzea, gatazka handitzea baizik. «Ekimen suntsitzailea» izan daitekeela gaineratu zuen.