Lizaso, Kanflanka, Alkorta eta Ormaetxea sailkatu ziren herenegun Erratzun Euskal Herriko finala jokatzeko. Ez zen ezuste bat bera ere egon, aurretik iragartzen ziren lau segalariek lortu baitzuten azken ekinaldian egoteko txartela. Garaipena, berriz, Alkortak lortu zuen.

Zazpi segalari neurtu ziren, eta bi multzotan banatuta lehiatu ziren. Lehenengoan, Alkorta izan zen nagusi, Kanflankaren eta Etxeberriaren aurretik. Bigarren multzoan, berriz, lau ziren lehian aritu ziren segalariak, eta Lizaso izan zen onena. Bigarren postuan sailkatu zen Ormaetxea, eta Orendaingoak ere azkeneko ekinaldian aritzeko txartela eskuratu zuen. Maguregi eta Intxaurbe izan ziren kanpoan geratu zirenak. Segalari bakoitzak ordu erdia izan zuen lanean aritzeko. Txapelketa hau era tradizionalean jokatzen dena da.

Gipuzkoako Txapelketa

Esnaolak eta Etxaburuak irabazi zuten atzo mutiletan eta nesketan nazioarteko erako Gipuzkoako Txapelketa. Zizurkilen jokatu zen neurketa eta 200 ikusletik gora batu ziren.

Mutilek 100 metro koadroko bi sail ebaki behar izan zituzten, eta 50 metro koadroko bina, neskek. Hemen abiadura eta txukuntasuna uztartzen dira. Ez du azkar ebakitzeak bakarrik balio, txukun ere ebaki behar izaten baita, bestela egindako denborari zigorra ere eransten zaio.

Mutiletan Esnaola eta Lizaso ziren irabazteko faboritoak, eta lehia bien artean izan zen. Azkenean Legorretakoak eraman zuen garaipena, eta bien artean 15 segundoko tartea besterik ez zen egon. Esnaola dago, gainera, Euskal Herriko Ligako lehen postuan, baina han ez da Lizaso lehiatzen ari; beraz, bi hauek ez dira aurten berriro elkarren aurka neurtuko.

Nesketan, Etxaburuak lortu zuen garaipena, eta Euskal Herriko Ligan egiten ari dena ez dela zorte on kontua argi eta garbi utzi zuen atzo. Oraingoan ere mendean hartu zuen Arrate Garin legorretarra. Orain, nazioarteko eran Euskal Herriko Liga falta da amaitzeko.